Чӑваш Ен ПТРК видеовӗнчен илнӗ скриншот

Елчӗкре Афалек Энтепе ( Олег Фёдорович Андреев) сӑвӑҫӑн асӑну каҫӗ иртнӗ. Вӑл пурӑннӑ пулсан 75 ҫул тултаратчӗ иккен. Мероприятие Елчӗкри вулавӑшра ирттернӗ.

«Пиртен пилӗк ҫул каялла уйрӑлса кайнӑ поэтӑн ячӗ, шел пулин те, республикипе янраса тӑракан ят мар: ӑна нумайӑшӗ пӗлмеҫҫӗ ҫав... Анчах вӑл питӗ ҫепӗҫ лирик, пултаруллӑ сӑвӑҫӑн чӗлхи илемлӗ. Вулама сӗнетӗп», — тесе ӑшшӑн хыпарланӑ мероприятире пулса курнӑ Марина Карягина халӑх тетелӗнчи хӑйӗн страницинче.

Афалек Энтепе вӗрентекен пулнӑ май Аслӑ Пӑла Тимеш вӑтам шкулӗнче хими, Энтепере нимӗҫ чӗлхипе чӑваш литератури вӗрентнӗ. Шкул директорӗнче те ӗҫленӗ, комсомолта та тимленӗ, парти райкомӗн секретарӗ те пулнӑ. Сӑвӑҫ чунӗллӗскер вара чунне ҫав енӗпе уҫнӑ.

Чӑваш наци вулавӑшӗн халӑх тетелӗнчи пабликинчи сӑнӳкерчӗк

Чӑваш наци вулавӑшӗ буфет уҫас кӑмӑллине пӗлтерет.

Культура учрежденийӗ халӑх тетелӗнчи хӑйӗн пабликӗнче хыпарланӑ тӑрӑх, пӗчӗк те хӑтлӑ кафе уҫасшӑн. Ун валли арендатор шыраҫҫӗ.

Кафе 17 тӑваткал метр лаптӑк йышӑнӗ.

Тӗплӗнрех ыйтса пӗлес тесен +7(8352) 23-02-17 (хушма номер 107) телефонпа шӑнкравлама сӗнеҫҫӗ.

archives21.rchuv.ru сӑнӳкерчӗкӗ

Ӗнер, юпа уйӑхӗн 6-мӗшӗнче, Шупашкарта «XXIV Петровские чтения» (чӑв. XXIV Петров вулавӗсем) пӗтӗм Раҫҫейри ӑслӑлахпа практика конференцийӗ иртнӗ.

Ку форума Чӑваш наци музейӗ 2001 ҫултанпа ирттерет. Унта музей сферинчи ҫивӗч ыйтусене музей ӗҫченӗсем ӑсчахсемпе тата педагогсемпе пӗрле сӳтсе яваҫҫӗ.

Конференцие Чӑваш наци музейӗн пӗрремӗш директорне Михаил Петров-Тинехпие асра тытса ят панӑ.

Кӑҫалхи форума Тӑван ҫӗршывӑн хӳтӗлевҫин ҫулталӑкне, Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитнине тата Чӑваш Енри Ҫар мухтавӗн музейӗ 25 ҫул тултарнине халалланӑ.

Чӑваш Енӗн Культура министерстви халӑх тетелӗнче вырнаҫтарнӑ видеоран илнӗ скриншот

Чӑваш Енри маттур ачасем республика шайӗнче кӑҫалхипе виҫҫӗмӗш хут иртекен «Асам» фестивале хутшӑнма хатӗрленеҫҫӗ.

Республикӑри шкул театрӗсен конкурсӗнче ачасем сцена ҫине хӑйсем лартнӑ ӗҫсемпе тухӗҫ. Малтан вӗсене муниципалитет шайӗнче пахалӗҫ. Муниципалитет шайӗнчи конкурс юпа уйӑхӗн 14-мӗшӗччен пырӗ. Унта суйласа илнисем республикӑри фестивале хутшӑнӗҫ.

Сӑмах май каласан, кӑҫалхи фестиваль теми — Тӑван ҫӗршывӑн хӳтӗлевҫин ҫулталӑкӗ тата Тӑван ҫӗршывӑн аслӑ вӑрҫинче ҫӗнтернӗренпе 80 ҫул ҫитни.

Камсем ҫӗнтернине раштав уйӑхӗн 5-мӗшӗнче пӗлтерӗҫ.

culture.cap.ru сӑнӳкерчӗкӗ

Кӑҫал паллӑ тюрколог, 17 томлӑ чӑваш чӗлхи словарне пухса хатӗрленӗ, СССР Наука академийӗн член-корреспонденчӗ Николай Ашмарин ҫуралнӑранпа 155 ҫул ҫитет. Ҫавна май Чӑваш Енӗн Наци вулавӑшӗ «Корифей чувашской филологии» онлайн-ивкторина ирттерет.

Николай Ашмарин чӑваш халӑхӗн культурипе вӗрентӗвне нумай тӳпе хывнӑ. Мускаври тухӑҫ чӗлхесен институтӗнче вӗреннӗ. Вӑл чӑваш чӗлхине нумай тӗпченӗ, унтан вӑл 17 томлӑ чӑваш чӗлхи словарьне пухса хатӗрленӗ. Вӑл кӑларӑм чӗлхе пӗлӗвӗнче питех те пӗлтерӗшлӗ.

culture.cap.ru сӑнӳкерчӗкӗ

Чӑваш патшалӑх филармонийӗнче кӑҫал та «Созвездие земляков» (чӑв. Ентешсен ҫӑлтӑрлӑхӗ) халӑхсем хушшинчи фестиваль иртӗ. Вӑл юпа уйӑхӗн 9-мӗшӗнчен пуҫласа юпа уйӑхӗн 30-мӗшӗччен пырӗ. Кашни кунах мар-ха.

Юпа уйӑхӗн 9-мӗшӗнче «Мелодии российского кино» программӑпа Тутарстанри филармони джаз-оркестрӗ сцена ҫине тухӗ. Юпа уйӑхӗн 17-мӗшӗнче Пушкӑртстанри филармонин камера оркестрӗ  «Времена года в Буэнос-Айресе» концерт кӑтартӗ. Юпа уйӑхӗн 23-мӗшӗнче Питӗрте пурӑнакан ентешӗмӗр Данил Прокопьев JUAN HORLENDIS BAND ушкӑнпа тата Регина Каргина вокалистпа килсе ҫитӗ.

Юпа уйӑхӗн 30-мӗшӗнче фестиваль хупӑнӗ.

chuvdram.ru сӑнӳкерчӗкӗ

Ӗнер, юпа уйӑхӗн 4-мӗшӗнче, Чӑваш академи драма театрӗнче Театр ӳнерне юратакансен клубӗн пӗрремӗш пухӑвӗ иртнӗ.

«Чӑннипех те уҫӑ калаҫу пулчӗ пирӗн! Хальхи чӑваш драматургийӗ тата унӑн пуласлӑхӗ, театрӑн репертуарӗнчи спектакльсем ҫинчен калаҫрӑмӑр, малашнехи аталану ҫул-йӗрӗ пирки пӗрле шухӑшларӑмӑр», — пӗлтернӗ культура учрежденийӗ халӑх тетелӗнчи хӑйӗн пабликӗнче.

Чӑваш драматургийӗ тата спектакльсем пирки чуна уҫса калаҫнӑ, артистсен ҫӗнӗ ӑрӑвне епле ӳстересси пирки те сӑмах хускатнӑ.

Тӗлпулӑва Марина Карягина поэт, сценарист, драматург тата журналист ертсе пынӑ. Театр директорӗ Елена Николаева та унта хутшӑннӑ.

Ҫитес тӗлпулу чӳк уйӑхӗн 1-мӗшӗнче 16 сехетре иртӗ. Унта «Карчӑксем качча каяҫҫӗ» спектакле сӳтсе явӗҫ.

Паян Чӑваш Енӗн наци вулавӑшӗнче Алексей Кулешовпа тӗлпулу иртӗ.

33-ри ҫамрӑк арҫын Кӑнтӑр Африкӑра пулса курни ҫинчен каласа кӑтартӗ. Тӗрӗссипе, вӑл 119 ҫӗршывра пулнӑ, Раҫҫейӗн кашни регионне тенӗ пек ҫитсе курнӑ. Алексей пилӗк континентра пурӑннӑ, Япӑх пӳртсенче чухӑнсем хӗсӗнсе пурӑнакан вырӑнсенче тата керменсенче пурӑнса пӑхнӑ. Ҫамрӑк арҫыннӑн чи юратнӑ регионӗсенчен пӗри — Кӑнтӑр Африка. Ҫавӑнпа вӑл унта пӗрмай каять.

Контактри «Чӑваш Ен Правительстви» пабликран илнӗ сӑнӳкерчӗк

Чӑваш Енӗн вӗренӳ министрӗн пӗрремӗш ҫумӗ пулма Максим Гришина шаннӑ.

Максим Юрьевич вӗренӳ тытӑмӗнче 15 ҫул ытла ӗҫлет. Маларах физика учителӗ, шкул директорӗн ҫумӗ пулса тӑрӑшнӑ. Мари Элта Вӗренӳ пахалӑхне тӗрӗслекен центра ертсе пынӑ.

Максим Гришина министр ҫумӗ пулма авӑн уйӑхӗн 30-мӗшӗнче ҫирӗплетнӗ.

cap.ru сӑнӳкерчӗкӗсемпе уса курнӑ

Иртнӗ уйӑхӑн вӗҫӗнче пирӗн республикӑри икӗ ҫынна «Чӑваш Республикин культурӑн тава тивӗҫлӗ ӗҫченӗ» ят пама йышӑннӑ. Хушӑва Элтепер авӑн уйӑхӗн 29-мӗшӗнче алӑ пуснӑ.

Вӗсенчен пӗри — Сӗнтӗрвӑрринчи тӗп клуб тытӑмӗн художник-оформителӗ Светлана Иванова, тепри — Шупашкарти тӗп клуб тытӑмӗн директорӗ Александр Матвеев.