Чӑваш Енӗн Экономика аталанӑвӗн министерствин сӑнӳкерчӗкӗ

Чӑваш Енри Куславкка тӑрӑхӗнче юртӑсем тӑваҫҫӗ. Кун пирки республикӑн вице-премьерӗ — экономика аталанӑвӗн министрӗ Дмитрий Краснов Телеграмри хӑйӗн каналӗнче пӗлтернӗ.

Ятарлӑ комисси ӗҫ-пуҫ епле пынине вырӑна тухсах тӗрӗсленӗ. «Кайӑк вӗҫевӗ» кану базинче глэмпинг тума тытӑннӑ. Хӑна ҫурчӗсене юрта евӗр тӑваҫҫӗ. Хальлӗхе 9 модультен 5-шне туса пӗтернӗ.

Унсӑр пуҫне унта ачасемпе аслисем валли спорт лапамӗсем пулӗҫ, мунчасем туса лартӗҫ. Кафепе мангаллӑ беседкӑсем ӗҫлесе кайӗҫ.

Массӑллӑ информаци хатӗрӗсенче Ҫӗрпӳ округӗнче биологи каяшӗсен купи пулни пирки хыпар сарӑлнӑ. Россельхознадзорӑн Чӑваш Енри специалисчӗсем вырӑна тухса тӗрӗсленӗ те ҫав вырӑнта чӑнах та выльӑх виллисем, шӑммисем йӑваланнине палӑртнӑ.

Вӗсем уҫӑ вырӑнтах выртнӑ. Ку вара – ветеринари саккунӗсене пӑсни. Ведомство ҫӗр харпӑрҫине – Ҫӗрпӳри ветеринарипе санитари утилизаци савутне – ҫитменлӗхсене пӗтерме хушнӑ. Ку савут Янсакассинче вырнаҫнӑ.

Республикӑра «Халӑх участковӑйӗ» конкурс иртет. Кӑҫал унта ШӖМ тытӑмӗнче ӗҫлекен 26 ҫын хутшӑнать. Вӗсенчен 6-шӗ - хӗрарӑмсем.

Пӗрремӗш тапхӑр авӑнӑн 20-мӗшӗччен иртет. Онлайн сасӑлавпа чи лайӑххине палӑртӗҫ. Юпан 7-16-мӗшӗсенче регион шайӗнчи тапхӑр пулӗ. Унта онлайн сасӑлавра ҫӗнтернӗ участковӑй республика чысне Раҫҫей шайӗнче хӳтӗлӗ. Вӑл чӳк уйӑхӗн 1-10-мӗшӗсенче иртӗ.

Сӑмах май, 2016, 2021 тата 2022 ҫулсенче чи лайӑх участковӑй пулнӑ Сергей Ипатьев кӑҫал та конкурса хутшӑнать.

/www.cap.ru сӑнӳкерчӗкӗ

Чӑваш Енри усламҫӑсем хӑна ҫурчӗсем тума патшалӑхран ҫӑмӑллӑхлӑ укҫа илейӗҫ. Пысӑк инвесторсене отельсене тума тата юсаса ҫӗнетме укҫа парас пирки республикӑн Экономика аталанӑвӗн тата пурлӑх хутшӑнӑвӗсен министерстви пӗлтерет.

«15 ҫуллӑха 70 миллиарлд тенкӗ таран илме пулать. Ҫулталӑкри процент ставки — 5 процент таран. Тӗп ставкине патшалӑх тӳлет. Инвесторсен хӑна ҫурчӗ, отель е виҫӗ ҫӑлтӑрлӑ санатори тумалла. Вӗсенче номер фончӗ 120-рен кая мар пулмалла», — уҫӑмлатнӑ экономика аталанӑвӗн тата пурлӑх хутшӑнӑвӗсен министрӗн ҫумӗ Ольга Рассанова.

Модульлӗ отель тӑвакансене патшалӑх пӗр номершӗн 1,5 миллион тенкӗ таран саплаштарма пултарать.

usolie-citi.ru сайтри сӑн

Улатӑрта пурӑнакан 72 ҫулти хӗрарӑм ултавҫӑсене 1 миллион ытла тенкӗ куҫарса панӑ. Вӑл полицире ҫапла каласа кӑтартнӑ: 2 кун каялла ун патне палламан ҫын шӑнкӑравланӑ, такамсем унӑн укҫине чикӗ леш енне куҫарма тӑни пирки каланӑ. Вӗсен ҫулне пӳлес тесен кредит илсе маларах «хӑрушсӑр счет» ҫине куҫармалла-мӗн.

Ватӑ хӗрарӑм хӑйӗн 300 пин тенкине тата кредит илнӗ 422 пин тенкине палламан ҫын каланӑ счет ҫине куҫарнӑ. Кун пирки вӑл тӑванӗсемпе те калаҫнӑ. Лешсем ӑна ку ултавҫӑсем пулнине каланӑ. Анчах кинемей ӗненмен.

Палӑртмалла: 2021-2023 ҫулсенче вӑл ултавҫӑсен аллине виҫӗ хутчен лекнӗ, ун чухне вӗсене 430 пин тенкӗ куҫарса панӑ.

cap.ru сӑнӳкерчӗкӗ

Специалистсем Зирекле юханшывӗнчи шыва тӗрӗсленӗ те вӑл вараланчӑк пулнине палӑртнӑ. Анализсем унта хӑш-пӗр сиенлӗ япала виҫи самай пысӑк пулнине кӑтартнӑ.

ЧР Ҫутҫанталӑк министерстви пӗлтернӗ тӑрӑх, юханшыва таса мар шыв лекнӗ. Кун хыҫҫӑн прокуратура вырӑнти аграри предприятине тӗрӗслеме тытӑннӑ. Унта Ҫутҫанталӑк министерствин специалисчӗсем те хутшӑнаҫҫӗ. Тӗрӗслев хыҫҫӑн юханшыв мӗншӗн вараланни паллӑ пулӗ.

cheb-centr.soc.cap.ru сӑнӳкерчӗкӗ

Шупашкарта социаллӑ ӗсчен пулса тӑрӑшакан Галина Кузьмина: «Манӑн платник та, повар та пулма тивет», — тесе калать.

Шупашкар хулинчи халӑхӑн социалла ыйтӑвӗсене тивӗҫтерекен комплекслӑ центрта пӗлтернӗ тӑрӑх, ватӑ ҫынсене пӑхасси пӗртте ҫӑмӑл ӗҫ мар. Утнӑ ҫӗрте утса, чупнӑ ҫӗрте чупса ҫӳресе ӗҫлеҫҫӗ социалла ӗҫченсем.

Галина Кузьмина социаллӑ сферӑра 6 ҫул ӗҫлет. Паян вӑл 9 ватта пӑхать. Хӑшӗсем патне кунне иккӗ ҫӳрет, хӑшӗсем патне — эрнере темиҫе хутчен. Вӗсем самай ҫулланнӑскерсем, 94 ҫултан пуҫласа 95 ҫулчченхи ҫынсем. Вырӑнпа выртакансем те пур. Ӳрӗк те вӑр-вар хӗрарӑм пурне те юрама тӑрӑшать. Ӗҫпе те, сӑмахпа та.

«Икра» авиакомпани ЧР Транспорт министерствине Шупашкартан Калининграда самолетсем яма сӗннӗ. Ведомство пӗлтернӗ тӑрӑх, рейссене 2025 ҫулта уҫма палӑртнӑ.

Хальхи вӑхӑтра авиакомпани Росавиаципе пӗрле субсидилекен авиасообщенисене переченьне кӗртес енӗпе ӗҫлеҫҫӗ.

Рейссем ҫитес ҫул ҫу уйӑхӗн 1-мӗшӗнчен пуҫласа авӑнӑн 30-мӗшӗччен эрнере икӗ хут пулӗҫ. Авиакомпани 110 вырӑнлӑ самолетсем вӗҫтерме палӑртнӑ.

"Лиза Алерт" архивӗнчи сӑн

Канашра 33 ҫулти хӗрарӑма шыраҫҫӗ. Анна Васильевна Александрова (Афанасьева) авӑн уйӑхӗн 6-мӗшӗнче килтен тухса кайнӑ та таврӑнман.

Вӑл 170 сантиметр ҫӳллӗш, вӑтам кӗлеткеллӗ, куҫӗ кӑвак, ҫӳҫӗ ҫутӑ. Ҫав кун хура футболка, хура шортик, симӗс сланца тӑхӑннӑ пулнӑ.

Ҫак хӗрарӑма курнӑ тӑк пӗр тӑхтамасӑр 8 800 700-54-52 (Раҫҫейре тӳлевсӗр) е 89777084704 Екатерина (Кирейчик) номерсемпе шӑнкӑравлама ыйтаҫҫӗ.

Сӑмах май, ҫурла уйӑхӗнче «Лиза Алерт» шырав отрядне ҫухалнӑ 47 ҫынна тупса ыйтса заявка килнӗ.

cap.ru сӑнӳкерчӗкӗ

Чӑваш Енри Патӑрьелте агротехнопарк тунӑ чухне хамӑр тӑрӑхра туса кӑларакан оборудованипе тата материалпа усӑ кураҫҫӗ.

Кун пирки республикӑн вице-премьерӗ — экономика аталанӑвӗн тата пурлӑх хутшӑнӑвӗсен министрӗ Дмитрий Краснов агротехнопарк строительстви епле пынипе паллашма кайнӑ хыҫҫӑн хӑйӗн Телеграм-каналӗнче пӗлтернӗ.

Дмитрий Краснов хыпарланӑ тӑрӑх, инженери инфраструктурине тунӑ чухне республикӑри предприятисен продукцийӗпе май килнӗ таран ытларах усӑ курма тӑрӑшаҫҫӗ. Подрядчикӗ — ПМК-8.