Яндекс Карты сайтри сӑн

Куславкка округӗнчи Пӑрмас ялӗнче пурӑнакан хӗрарӑм Совет тата Петров урамӗсенче ҫутӑ ҫук тесе прокуратурӑна ҫӑхав ҫырнӑ.

Тӗрӗслев пулнӑ. Чӑнах та, урамсем хӗресленекен вырӑнта ҫутӑ ҫитмен. Кун хыҫҫӑн ял ҫыннисене каҫхине те ҫӳреме хӑрушӑ ан пултӑр тесе темиҫе хунар вырнаҫтарнӑ. Куславкка округӗн администрацийӗ тӗлӗшпе представлени ҫырнӑ.

«Чеб.ру» сайтри сӑн

Кӗҫӗр республикӑра ҫил вӑйланнӑран темиҫе округри ялсем электричествӑсӑр тӑрса юлнӑ: Муркаш, Сӗнтӗрвӑрри, Шупашкар, Шӑмӑршӑ, Елчӗк, Красноармейски районӗсенче. Пӗтӗмпе 8,2 пин ҫын ҫутӑсӑр юлнӑ. Ку – ирхи 6 сехет тӗлне. Хальхи вӑхӑтра 6 бригада, 18 ҫын, 6 техника ӗҫлеҫҫӗ.

«Чӑваш Енри ҫанталӑк» проект авторӗ Владимир Михайлов пӗлтернӗ тӑрӑх, шӑматкун каҫхине ҫил каллех вӑйланӗ. Тунтикун кӑна лӑпланӗ.

Красноармейски округӗнче ЗАГС ӗҫченӗсес хӑйне евӗрлӗ ят регистрациленӗ: Каллиста. Хӗр пӗрчи чӳк уйӑхӗн 13-мӗшӗнче ҫут тӗнчене килнӗ.

Каллиста Пикшик ял тӑрӑхӗнче пурӑнакан Елисейпа Светлана Филипповсен ҫемйинче ҫуралнӑ. Ҫак ят амӑшне тӗлӗкре тӗлленнӗ-мӗн.

Каллиста авалхи грек чӗлхинчен куҫарсан «чи хитри» тесе куҫать.

freepik.com сайтри сӑн

Йӗпреҫ округӗнчи икӗ тӑван ултавҫӑсен аллине лекнӗ.

45 ҫулти арҫына аферистсем ҫуллах улталанӑ, инвестицие укҫа хывма сӗннӗ. Ҫапла вӑл палламан ҫынна 1,7 миллион тенкӗ куҫарса панӑ. Кун пирки вӑл полицие пӗлтернӗ.

Нумаях пулмасть ун патне каллех шӑнкӑравланӑ, укҫана тавӑрса пама шантарнӑ. Анчах ку ӗҫе кредитпа ҫыхланман ҫынна явӑҫтармалла-мӗн. Арҫын тӑванне явӑҫтарнӑ. Ҫапла лешӗ 1,5 миллион ытла тенкӗ ҫухатнӑ.

Ку тӗслӗх тӗлӗшпе пуҫиле ӗҫ пуҫарнӑ.

Следстви комитечӗ тунӑ сӑн

Катер штурвалӗ умӗнче пулнӑ арҫын тӗлӗшпе пуҫиле ӗҫ пуҫарнӑ. Ӑна пула пассажир шар курнӑ.

Следстви версийӗ тӑрӑх аванӑн 1-мӗшӗнче вӑл «Амур - 3» катер штурвалӗ умӗнче пулнӑ. Вӑл хӑрушсӑрлӑх йӗркине пӑхӑнман. Ҫавна май ҫӑлав жилетне тӑхӑнман пассажир шыва ӳкнӗ.

Пассажир мотор винтне пула пуҫне, питне амантнӑ. Халӗ ӗҫ-пуҫа уҫӑмлатаҫҫӗ, следстви пырать.

cap.ru сӑнӳкерчӗкӗ

«Россеть Атӑл» – «Чӑвашэнерго» 35 кВ-ран пысӑкранх подстанцисен ӗҫне тишкернӗ. Предприятин Кӑнтӑр производство уйрӑмӗн Тӑвайри подстанцийӗ мала тухнӑ. Иккӗмӗш тата виҫҫӗмӗш вырӑнсене «Первомайская» тата Улатарти подстанцисем йышӑннӑ.

Тӑвайри подстанци 4,3 пине яхӑн ҫынна ҫутӑпа тивӗҫтерсе тӑрать.

"Про Город" архивӗнчи сӑн

Ҫӗмӗрлере чӳк уйӑхӗн 15-мӗшӗнче йытӑ икӗ хӗрачана тапӑннӑ. Пӗрине вӑл ҫыртнӑ, тумне ҫӗтнӗ. Тепринне кутамккине ҫурса тӑкнӑ. Юрать, хӗрарӑм пулӑшнӑ. Вӑл ачасем кӑшкӑрнине илтсе пулӑшма васканӑ. Вӑлах васкавлӑ медпулӑшу чӗннӗ. Вӑл ҫапкаланчӑк йытӑ пулман. Ӑна хуҫи урама уҫӑлма кӑларнӑ-мӗн.

Ку кӑнтӑрла 12 сехет иртсен Банк тӑкӑрлӑкӗнчи 6-мӗш ҫурт ҫывӑхӗнче пулнӑ. 12-ри хӗрачасем шкултан таврӑннӑ. Пӗрне пульницӑна илсе кайнӑ, йытӑ ӑна пӗҫҫинчен ҫыртнӑ.

Ачасен амӑшӗсем прокуратурӑран пулӑшу ыйтасшӑн.

gryazoveckij-r19.gosweb.gosuslugi.ru сайтри сӑн

Ҫӗмӗрле округӗнчи 48 ҫулти арҫын Мускава кайса палламан ҫынна укҫа куҫарса панӑ, унтан Хусана кайса машинине сутса янӑ, укҫине каллех куҫарса панӑ. Унтан тин вӑл полицие кайнӑ.

Ултавҫӑсем стандартлӑ схемӑпа усӑ курнӑ: мессенджерта шӑнкӑравланӑ, унӑн счечӗ ҫинчи укҫана террористсем патне куҫарнӑ имӗш. Унпа йӗрке хуралҫи калаҫать имӗш.

Арҫын кун пирки арӑмне каланӑ. Лешӗ ку ултавҫӑсем пулнине каланӑ. Анчах арҫын ӗненмен. Малтан вӑл хӑйсен тӑрӑхӗнче 2,5 млн кредит илнӗ. Унтан Мускава кайса укҫана палламан ҫынна тыттарнӑ. Мускавра вӑл тепӗр 1,3 млн кредит илсе палламан ҫынна панӑ.

Киле таврӑннӑ чухне ун патне каллех шӑнкӑравланӑ. Унӑн машини арестра имӗш. Арҫын Хусана кайса ӑна йӳнӗрехпе сутнӑ. Укҫине каллех куҫарса панӑ.

Иномаркк ҫухалнине арӑмӗ асӑрханӑ, ыйтма пуҫланӑ. Арҫын нумай вӑхӑт каласа паман, мӗншӗн тесен следстви пирки пӗлтерместӗп тесе сӑмах панӑ. Кайран арӑмне итлесе полицие кайнӑ. Ҫапла вӑл ултавҫӑсене пӗтӗмпе 5 млн та 480 пин тенкӗ куҫарса панӑ.

ШӖМ тунӑ сӑн

Чӑваш Енре «Ӳсӗр водитель» рейд ирттерме палӑртнӑ. Вӑл

чӳк уйӑхӗн 15-17-мӗшӗсенче иртӗ. Ҫул-йӗр инспекторӗсем ытларах транспорт нумай ҫӳрекен вырӑнсенче пулӗҫ. Водительсене чарса вӗсем эрех-сӑра ӗҫнипе ӗҫменнине тӗрӗслӗҫ.

Сӑмах май, ҪҪХПИ инспекторӗсем кунашкал рейдсене тӑтӑшах ирттереҫҫӗ.

culture.ru сайтри сӑн

Ҫитес ҫул Тӑван ҫӗршывӑн Аслӑ вӑрҫи пӗтнӗренпе 80 ҫул ҫитнӗ май вӑрҫӑ ачисене укҫан хавхалантарассине ЧР Элтеперӗ Олег Николаев пӗлтернӗччӗ. Халӗ мӗн чухлӗ укҫа парасси паллӑ.

Ҫитес ҫул республикӑри 42 пине яхӑн вӑрҫӑ ачи 2-шер пин тенке тивӗҫӗ. Ҫак тӗллевпе хыснаран 83,7 миллион тенкӗ уйӑрӗҫ.

Сӑмах май, ҫак категорие кӗрекен ҫынсем валли уйрӑм тӳлев ҫук. Республикӑри 818 вӑрҫӑ ачин комманаллӑ тӑкакӗсен 25 процентне саплаштараҫҫӗ.