mintrud.cap.ru сӑнӳкерчӗкӗ

Чӑваш Енре кӗмӗл волонтёрсен конкурсӗ иртет. Ӑна республикӑн Ӗҫ тата социаллӑ хӳтлӗх министерстви йӗркеленӗ.

«Ҫӗнтерӳ волонтёрӗ» номинацие Раҫҫей ҫарне пулӑшакан, гуманитари пулӑшӑвӗ кӳрекен ватӑсем хутшӑнма пултараҫҫӗ.

«Волонтёр-наставник» номинацие — ачасене пӑхса пулӑшакансем, ватӑсене пулӑшу кӳрекенсем; «Эко-волонтёр» номинацие — ҫутҫанталӑка хӳтӗлессипе тӑрӑшакансем; «Социаллӑ экспреса» — тӗрлӗ мероприятие хастар хутшӑнакансем.

Документсене mintrud@cap.ru электрон адреспа ярса памалла. Вӗсене авӑн уйӑхӗн 23-мӗшӗччен йышӑнӗҫ.

Ҫӗнтерӳҫӗсене «Кӗмӗл Чун» республикӑри форумра чыслӗҫ.

funnyart.club сӑнӳкерчӗкӗ

Килес ҫултан Чӑваш Енри вӑрманҫӑсен шалӑвӗ ӳсӗ.

«2025 ҫултан пуҫласа Раҫҫей Президенчӗ Владимир Путин хушнипе лесниксен ӗҫ укҫи ӳсӗ. Чӑваш Республикине тепӗр ҫул ҫак тӗллевсем валли ӗҫ укҫи фончӗн 24% ӳсӗмне пӑхса хӑварнӑ», — палӑртнӑ Вӑрман хуҫалӑхӗн федераци агентствин ертӳҫи Иван Советников Чӑваш Ен Элтеперӗпе Олег Николаевпа тӗл пулсан.

Чӑваш Ен Пуҫлӑхӗ каланӑ тӑрӑх, вӑрман хуҫалӑхӗнче ӗҫлекенсен вӑтам ӗҫ укҫи республикӑри вӑтам шалуран 2,1 хут пӗчӗкрех. Ӗҫ укҫине ӳстерсен кадрсен ыйтӑвӗ те лайӑхланӗ.

klike.net сӑнӳкерчӗкӗ

Чӑваш Енри икӗ ҫынна республика Элтеперӗ Олег Николаев паттӑрлӑхшӑн чысланӑ.

«Чӑваш Республики умӗнчи тава тивӗҫлӗ ӗҫсемшӗн» орден медалӗпе ҫар чаҫӗн — 29682 уй почтин комендант батальонӗн 2-мӗш комендант ротин санитари инструкторне Михаил Иванова наградӑланӑ.

Чӑваш Республикин Хисеп грамотине 26388 ҫар чаҫӗн снайперӗ Евгений Михайловский тивӗҫнӗ.

"Про Город" сайтӗнчи сӑн

Елчӗк муниципаллӑ округӗнчи Патреккел ялӗнче пурӑнакан арҫын пысӑк кӑмпа тупнӑ. Киле ҫитсен тараса ҫинче виҫсе пӑхнӑ та - 4 килограмм ытла.

Халӑх корреспонденчӗ «Про Город» хаҫата пӗлтернӗ тӑрӑх, вӑл кӑмпана ҫурла уйӑхӗн 23-мӗшӗнче тупнӑ. Ҫав кӑмпа «дождевик» ятлӑ-мӗн.

ШӖМ тунӑ сӑн

Ҫул-йӗрпе патруль службин инспекторӗсем Денис Гордеев тата Павел Балыков «Шупашкар - Сурски» ҫул ҫинче васкакан «Тойотӑна» чарнӑ. Унта вара тӑннӗ ҫухатнӑ 32-ри пассажир выртнӑ. Унӑн энцефалит пулма пултарнӑ. Полицейскисем кашни минут хаклине шута илсе машинӑна пульницӑна ҫити ӑсатма йышӑннӑ. Вӗсем пулӑшнипе пациента вӑхӑтра медпулӑшу панӑ. Тӑванӗсем вара ЧР шалти ӗҫсен министрне тав туса ҫырса янӑ.

Дмитрий Краснов страницинчен илнӗ сӑнӳкерчӗк

Чӑваш Енри нумай ӗҫ тӑвакан центрсенчи специалистсен шалу пӗчӗк. Ҫакӑн пек пӗлтернӗ республикӑн экономика министрӗ Дмитрий Краснов халӑх тетелӗнчи хӑйӗн страницинче.

Ӗҫе тинтерех вырнаҫнӑ ҫын унта 26 пин тенкӗ илет иккен, вӑтам шалу вара уйӑхсерен 33 пин тенкӗпе танлашать-мӗн.

«Экономика аталанӑвӗн министерствин ертӳҫи пулнӑ май эпӗ МФЦсен ӗҫне те сӑнаса тӑратӑп, лару-тӑрӑва ылмаштарӑпӑр.

Ӗҫ укҫине ҫитес ҫултан ӳстерме укҫа пӑхса хӑварӑпӑр. Уйӑхри вӑтам ӗҫ укҫи 39 пин тенке ҫитӗ», — тесе хыпарланӑ министр.

cap.ru сайтри сӑн

Ҫӗмӗрле округӗнче Республикӑри шыравпа ҫӑлав службин ҫӑлавҫисем вӑрманта ҫухалса кайнӑ кинемее киле ҫитме пулӑшнӑ.

Кинемей ҫухални пирки пӗрлехи службӑна ҫурла уйӑхӗн 20-мӗшӗнче 11 сехет те 37 минутра шӑнкӑравласа пӗлтернӗ. Ватӑ хӗрарӑм Анат Кӑмаша ялӗ ҫывӑхӗнчи вӑрманта аташса кайни пирки хыпарланӑ. Вӑл унта кӑмпа пуҫтарма кайнӑ.

Ҫӑлавҫӑсем вырӑна тухса кинемее часах тупнӑ. Аса илтерер: «Лиза Алерт» ушкӑн Улатӑр округӗнчи Кире поселокӗнчи Геннадий Рогулина шырать. Вӑл та вӑрманта ҫухалнӑ.

"Контактри" сӑн

Ҫӗрпӳ хулинче пурӑнакан Александр Харитонов Атӑлта тем пысӑкӑш ҫуйӑн тытнӑ. Пулӑ 70 килограмм таяканскер.

Ҫурла уйӑхӗн 20-мӗшӗнче Александр юлташӗпе кимӗпе пулӑ тытнӑ. Ӑнсӑртран вӗсем авӑрта ҫуйӑна асӑрханӑ. Александр ӑна хӑй тӗллӗн ӑсталанӑ квок сассипе илӗртсе кӑларнӑ.

Вӗсем пулӑпа 20 минут кӗрешнӗ. Ҫуйӑн шыв ҫийӗн курӑнсан тусӗ тӗлӗннипе кӑшкӑрсах янӑ. Адександр вара пулӑпа малалла кӗрешнӗ. Ҫуйӑна кимме хурса ҫыран хӗррине илсе тухма пулӑшу кирлӗ пулнӑ.

37-ри Александр унччен те пысӑк пулӑсем тыткаланӑ. 16 килограмм таяканни пулнӑ. Ку ҫуйӑн вара – чи пысӑкки.

"Лиза Алерт" архивӗнчи сӑн

Улатӑр округӗнчи Кире поселокӗнче пурӑнакан Геннадий Рогулев вӑрмана кайсан ҫухалнӑ. Халӗ ӑна «Лиза Алерт» хастарӗсем шыраҫҫӗ.

64 ҫулти Геннадий Иванович ӗнер ҫухалнӑ. Вал вӑрмана кайни паллӑ. Арҫын 176 сантиметр ҫӳллӗш, вӑтам кӗлеткеллӗ, куҫӗ ҫутӑ хӑмӑр, ҫӳҫне шакла хырнӑ. Килтен кайнӑ кун тӗттӗм куртка, хура шӑлавар, хура калуш тӑхӑннӑ.

Геннадий Рогулева куракансене ҫак номерсемпе шӑнкӑравлама ыйтаҫҫӗ: 8 800 700-54-52, 8 952 020-35-57 Елена (Касатка) , 8 919 666-66-80 Наталия (Симба) .

"На связи" форумри сӑн. Халӗ ку ӳкерчӗк ҫук

«Чӑваш Ен» Издательствӑпа полиграфи комплексӗ валли директор шыраҫҫӗ. ЧР Экономика министерстви кандидатсенчен заявленисем ыран йышӑнма пуҫлать. Авӑн уйӑхӗн 5-мӗшӗччен ӗлкӗрмелле. Ӑна аслӑ пӗлӳ илнӗ, ертӳҫӗ должноҫӗнче ӗҫленӗ ҫынсенчен кӑна йышӑнаҫҫӗ. Кунсӑр пуҫне обществӑн аталану программине тӑратмалла.

Палӑртмалла: Издательствӑпа полиграфи комплексне 2021 ҫулхи утӑ уйӑхӗнчен Алексей Ключников ертсе пырать. Ҫурлан 5-мӗшӗнченпе вӑл тӗп директор тивӗҫне вӑхӑтлӑх пурнӑҫлать тесе палӑртнӑ.