Леонид Ватковский

Паян Чӑваш Енӗн экономика аталанӑвӗн, промышленноҫӑн тата суту-илӗвӗн министрӗн ҫумне ҫирӗплетнӗ. Министр ҫумӗсене республикӑн Правительствин пуҫлӑхӗ палӑртать те, 483-мӗш номерлӗ йышӑнӑва Иван Моторин премьер-министр алӑ пуснӑ.

Чӑваш Енӗн экономика аталанӑвӗн, промышленноҫӑн тата суту-илӗвӗн министрӗн ҫумӗн пуканне Леонид Ватковский йышӑннӑ. Анчах вӑхӑтлӑха. Ҫак йӗркесен авторӗ пӗлнӗ тӑрӑх, Ватковский Ольга Ланцова вырӑнне ӗҫлӗ, мӗншӗн тесен лешӗ декрет канӑвне кайнӑ.

50 ҫулти Леонид Ватковский — Шупашкарти ликерпа водка савучӗн директорӗ пулнӑ Геннадий Ватковский ывӑлӗ. «Стратегия» коммерци банкӗн Шупашкарти филиалне хупиччен унта ӗҫленӗ. Хӑй вӑхӑтӗнче вӑл Чӑваш Енӗн бильярдного спорчӗн федерацине ертсе пынӑ.

Футбол енӗпе тӗнче чемпионачӗ ӗнер хупӑнчӗ. Спортӑн ҫак енне суйланисем пирӗн ҫӗршыври 11 хулари чаплӑ стадионсенче футболпа киленме пултарчӗҫ. Ӑмӑрту иртмен хуласенче те ҫынсене матча тӳрӗ эфирта пӑхма май туса пачӗҫ — ятарлӑ лапамсенче пысӑк экрансем вырнаҫтарчӗҫ. Ун пекки Шупашкарта та пулчӗ.Футбол енепе тӗнче чемпиоанчӗ пынӑ вӑхӑтра Шупашкара Колумби, Аргентина, Иран, Польша, Китай, Франци тата ытти ҫӗршыв турисчӗсем — пурӗ 570-ӗн — килсе ҫитнӗ.

Шупашкар хула администрацийӗн культура тата туризма аталантарас енӗпе ӗслекен управленийӗнче пӗлтернӗ тарӑх, ҫӗртме уйӑхӗн 17-мӗшӗнчен пуҫласа утӑ уйӑхӗн 7-мӗшӗччен Чӑваш Енӗн тӗп хулинчи Хӗрлӗ лапамра пысӑк экранпа ӑмӑртӑва 20 пине яхӑн ҫын пӑхнӑ.

Ют ҫӗршыв хӑнисем «Ибис», «Республика», «Гарден спа-отель», «Чувашия», «Волга» хӑна ҫурчӗсенче пурӑннӑ.

Пушар дачӑсене те шеллемест

Иртнӗ талӑкра Чӑваш Енре икӗ хутчен вут-ҫулӑм тухнӑ. Иккӗшӗ те хӑрушсӑрлӑх правилине пӑснипе ҫыхӑнма пултарнӑ. Ҫак шухӑша Чӑваш Енӗн Инкеклӗ ӗҫсен патшалӑх комитетӗнче палӑртаҫҫӗ.

Ӗнер, утӑ уйӑхӗн 15-мӗшӗнче, 11 сехет те 38 минутра Шупашкар районӗнчи Атайкасси ҫывӑхӗнчи пахча юлташлӑхӗсенчен пӗринче дача ҫуртӗнче вут хыпса илнӗ. «Хӗрлӗ автан», малтанласа шухӑшланӑ тӑрӑх, хуҫине, 62-ри хӗрарӑма, 100 пин тенкӗлӗх шар кӑтартнӑ. Специалистсем инкек сӑлтавӗ газ оборудованийӗпе усӑ курнӑ чухне асӑрханусӑр пулни тесе тӗшмӗртеҫҫӗ.

Куславкка районӗнчи Варасӑр ялӗнче 37-ри кил хуҫин 50x12 метр калӑпӑш кирпӗч склачӗ ҫунма тытӑннӑ. Инкек электрохатӗрпе тимсӗртерех пулнӑран тухнӑ пуль теҫҫӗ. Вута пула хуҫи, малтанласа шухӑшланӑ тӑрӑх, ҫур миллион тенкӗлӗх тӑкак тӳснӗ.

Ҫулталӑк пуҫланнӑранпа пирӗн республикӑра 496 хут пушар тухнӑ. Вӗсенче 39 ҫын вилнӗ, 48-ӑн суранланнӑ.

Чӑваш Енри предприяти-организацисенче сутуҫӑсем, хуралҫӑсем, диспетчерсем, медицина ӗҫченӗсем кирлӗ. Ҫакӑн пирки паян Чӑваш Ен Элтеперӗ Михаил Игнатьев Правительство пайташӗсемпе ирттернӗ канашлура Ӗҫ тата социаллӑ хӳтлӗх министрӗ Сергей Димитриев пӗлтернӗ.

Тӳре-шара аслӑ ҫулхисене ӗҫе илмелли, вӗсене ӗҫрен кӑларса ямалла марри пирки сӑмах хускатнӑ.

Чӑваш Енӗн патшалӑх ӗҫ инспекцийӗн ертӳҫи Алексей Метелкин пенси ӳсӗмӗнчи ӗҫченсен ӗҫ прависене пӑхӑннине тӗрӗслеме кӑҫалхи пӗрремӗш ҫур ҫулта ҫичӗ рейд ирттернине пӗлтернӗ. Йӗркене пӑсакансем пур иккен. Пурӗ 17 тӗслӗхе ҫирӗплетнӗ. Ҫавӑншӑн айӑплисене административлӑ майпа явап тыттарнӑ.

Чӑваш Енӗн патшалӑх ӗҫ инспекцийӗнче, сӑмах май, «хӗрӳ лини» ӗҫлет. Кӑлтӑк пирки 8 (8352) 62-90-61, 62-01-79 телефон номерӗсемпе шӑнкӑравласа систерме май пур.

Чӑваш Енри ял хуҫалӑх министрӗ Сергей Артамонов халӑхран пухакан сӗт хакӗ ӳсме тытӑнассине пӗлтерет. Юлашки эрнере вӑл 10 пус хӑпарнӑ ав.

Специалистсем ҫирӗплетнӗ тӑрӑх, ҫитес 1 уйӑх ҫурӑра хак ӳссех пырӗ. Ку ҫӗршыва типӗ сӗт кӳрсе килес ӗҫе федераци шайӗнче тӗрӗслесе тӑрассипе ҫыхӑннӑ. Паянтан типӗ сӗтпе пӗр компани ҫеҫ тивӗҫтерӗ. «Пирӗн тӗллев – Чӑваш Енре 200 тоннӑна яхӑн сӗт туса илесси. Икӗ ҫулта эпир ҫакна тума пултаратпӑр», - тенӗ Сергей Артамонов.

Кӑҫал, пӗлтӗрхипе танлаштарсан, тырӑ хакӗ те пысӑкрах пуласса шантараҫҫӗ. Раҫҫейри тырӑ пӗрлӗхӗн специалисчӗсен тата РФ Ял хуҫалӑх министерствин шухӑшӗпе, кӑҫал пӗр килограмм тырӑ 8 тенкӗрен кая мар пулмалла.

Чӑваш Ен каччи Мускава сройкӑна ӗҫлеме кайнӑ. Укҫа ӗҫлесе илес тенӗ ӗнтӗ вӑл. Ара, халӗ нумайӑшӗ пысӑк укҫа илес тесе шапаша ҫӳреҫҫӗ. Шел те, ҫак каччӑн пурнӑҫӗ сарӑмсӑр татӑлнӑ.

Ҫамрӑкскер 21 ҫулта кӑна пулнӑ. Утӑ уйӑхӗн 15-мӗшӗнче Етӗрнере ҫуралса ӳснӗскер стройкӑра 20-мӗш хутран ӳкнӗ. Инкек ирхи 9 сехетре пулнӑ. Кун пирки сарӑмсӑр вилнӗ каччӑн пӗлӗшӗсем «Про Город» хаҫата пӗлтернӗ.

Халӗ ку ӗҫ тӗлӗшпе РФ Следстви комитечӗ ӗҫлет. Следовательсем хӑрушсӑрлӑх техникине пӑснипе пӑсманнине уҫӑмлатаҫҫӗ.

Шупашкарти Ленин район администрацийӗн ӗҫченӗсем Тӗп пасар умне рейда тухнӑ. Пасар ҫывӑхӗнче карчӑк-кӗрчӗк суту тума юратать-ҫке-ха.

Унта сӗт юр-варӗ (тӑпӑрчӑ, сӗт, хӑйма), тӑварланӑ ҫимӗҫсем сутаҫҫӗ. Вӗсене йӗркеллӗ те хумаҫҫӗ, хурт-кӑпшанкӑ ирӗклӗнех пырса лараҫҫӗ.

Аяла курупка лартаҫҫӗ. Вӗсене вара ҫӳп-ҫап контейнерӗсенчен йӑтса килеҫҫӗ. Пӗр сӑмахпа, ял ҫыннисем ҫимӗҫсене ҫӗр ҫине сарса хурса сутаҫҫӗ.

Йӗркене пӑсса суту тӑвакансене хӑваласа янӑ. Кунашкал рейдсем кашни кун иртессине пӗлтереҫҫӗ. Сутакансене вара ҫакна асӑрхаттарнӑ: хула администрацийӗ ялти сутуҫӑсем валли ятарлӑ вырӑнсем уйӑрса панӑ. Ку ыйтупа Тӗп пасар ертӳлӗхӗпе 2015 ҫултах калаҫса татӑлнӑ. Унашкал ҫынсене йӳнӗ вырӑн уйӑрса панӑ: кунне 30 тенкӗрен пуҫласа.

Сехет йӗппине маларах куҫармалла-и е ҫук-и? Ҫак ыйту тавра тахҫанах тата хӗрӳ калаҫрӗҫ. Ыйтӑва каллех ҫӗкленӗ. Ӑна ЧР Патшалӑх Канашӗн депутачӗсем сӳтсе явӗҫ.

ЧР Патшалӑх Канашӗн председателӗ Валерий Филимонов плана кӗртме пуху ирттерме палӑртнӑ. Ӑна ыран, утӑ уйӑхӗн 17-мӗшӗнче, 10 сехетре ирттерӗҫ. Депутатсем унта сехет йӗппине куҫарас ыйтӑва сӳтсе явӗҫ.

Кунсӑр пуҫне парламент пенси ыйтӑвӗпе ҫыхӑннӑ федераци саккунӗн проектне пӑхса тухӗ. Ку пенси ӳсӗмне хӑпартас ыйтӑва пырса тивет.

Вӑрмарти вӑй-хал культурипе сывлӑха ҫирӗплетмелли комплексӑн инструкторне судпа айӑпланӑ, унӑн ирӗкне 1 ҫул та 2 уйӑхлӑха чикӗленӗ.

Инструктор бассейнра арҫын путса вилнӗшӗн явап тытнӑ. Ку инкек 2017 ҫулхи раштав уйӑхӗн 14-мӗшӗнче пулнӑ. 52 ҫулти ӳсӗр арҫын юлташӗсемпе бассейна килнӗ. Хайхискер ишнӗ вӑхӑтра шыв айне путнӑ. Ыттисем ӑна туртса кӑларнӑ-ха, анчах пӗрремӗш медпулӑшу парсан та арҫын сывлама пӑрахнӑ.

Ҫав вӑхӑтра инструкторӑн ӗҫ вырӑнӗнче лармалла пулнӑ. Вӑл вара нимӗнле сӑлтавсӑрах ӗҫрен тухса кайнӑ.

Хальлӗхе приговор саккунлӑ вӑя кӗмен-ха.

Канмалли кунсем шӑрӑх тӑнӑран ҫынсем шывра чӑмпӑлтатса уҫӑлнӑ. Икӗ кунра Шупашкарти тӗп пляжра 4 ҫынна путасран ҫӑлнӑ.

Ҫӑлавҫӑсем 60 ҫулти хӗрарӑма, 5-ри тата 8-ти арҫын ачасене, 5-ри хӗрачана шывран кӑларнӑ.

Шел те, канмалли кунсем инкексӗр иртмен. Утӑ уйӑхӗн 14-мӗшӗнче Шупашкар районӗнче 55 ҫулти арҫын путса вилнӗ. Унӑн виллине ҫӑлавҫӑсем тепӗр кунхине кӑларнӑ. Утӑ уйӑхӗн 15-мӗшӗнче «Прометей» кану бази ҫывӑхӗнче Ҫӗнӗ Шупашкарта ҫуралса ӳснӗ 25 ҫулти каччӑ шыв айне кайнӑ. Икӗ тӗслӗхре те ҫынсем юраман ҫӗрте чӑмпӑлтатнӑ.