dzen.ru сайтри сӑн

Юпа уйӑхӗн 28-мӗшӗнче 17 сехет те 59 минутра Шупашкар муниципаллӑ округӗнчи Ҫутпылӑх ялӗ ҫывӑхӗнче сурӑхсен кӗтӗвӗ машина айне лекнӗ. Ҫакӑ регистратор ҫине лекнӗ.

Регистраторпа пыракан водитель ҫулпа чупакан сурӑхсене асӑрханӑ. Хирӗҫ килекен машина водителӗ вара курса ӗлкӗреймен. Вӑл сурӑхсем ҫине кӗрсе кайнӑ. Темиҫе выльӑх вилнӗ.

Сурӑхсем ҫул ҫинче мӗн тунӑ? Вӗсене кам кӑларса янӑ? Паллӑ мар.

stylishbag.ru сайтри сӑн

«Хыпар» Издательство ҫурчӗ тата темиҫе район хаҫачӗ валли ертӳҫӗ шыраҫҫӗ. Ҫавна май ЧР Цифра министерстви конкурс ирттерет. Тӑвай, Йӗпреҫ, Канаш, Куславкка, Пӑрачкав, Ҫӗрпӳ районӗсенчи хаҫатсем валли ертӳҫӗсем кирлӗ.

Конкурса хутшӑнас текенсен аслӑ пӗлӳ пулмалла, ертӳҫӗ должноҫӗнче 5 ҫултан кая мар ӗҫлемелле. Документсене юпан 30-мӗшӗнчен пуҫласа чӳкӗн 30-мӗшӗччен министерствӑра йышӑнаҫҫӗ. Конкурса раштавӑн 13-мӗшӗнче пӗтӗмлетме палӑртнӑ.

cap.ru сайтри сӑн

Чӑваш Енре ҫитес ҫула Экологи культурине тата ҫутҫанталӑкпа перекетлӗ усӑ курнине халаллӗҫ. Кун пирки ЧР Элтеперӗ хушӑва алӑ пуснӑччӗ ӗнтӗ.

Ҫитес ҫулталӑк валли логотип суйламалла. Ҫавна май конкурс ирттерме йышаннӑ. Вӑл юпа уйӑхӗн 30-мӗшӗнче пуҫланать те чӳк уйӑхӗн 20-мӗшӗнче вӗҫленет.

Конкурса Раҫҫей гражданинӗсем хутшӑнма пултараҫҫӗ. Кашниех номинацие пӗр ӗҫрен ытларах мар тӑратма пултарать. Чи лайӑх логотип тата девиз шутласа кӑларакансене 1-3-мӗш вырӑнсем парса хаклӑ парнепе, дипломпа хавхалантарӗҫ.

cap.ru сайтри сӑн

Вырсарникун пӗр хӗрарӑм ветеринарсенчен пулӑшу ыйтнӑ. Унӑн Маша ятлӑ ӗни суранланнӑ иккен.

5 ҫулти ӗне хапха умӗнче хыҫкаланса тӑнӑ та тӑрук мӗкӗрсе янӑ. Куҫне алӑк ҫӑрин тимӗр пайӗ кӗрсе ларнӑ иккен.

Ветеринар часах килнӗ. Тимӗр куҫ хупанки ҫине тӑрӑннӑ, ҫавна май куҫӗ хӗрелнӗ, шыҫӑннӑ, куҫҫулӗ юхнӑ. Ветеринар тимӗре кӑларса сурана кирлӗ хатӗр-хӗтӗрпе сӗрнӗ. Кӗҫех ӗнен куҫӗ тӳрленме пуҫланӑ.

Тӗп суйлав комиссийӗн архивӗнчи сӑн

Патӑрьелти территори суйлав комиссийӗ ачасен хушшинче «Манӑн ҫекӗл» конкурс ирттерет. Унта ача пахчине тата шкула ҫӳрекенсем хутшӑнма пултараҫҫӗ.

Конкурсҫӑсен суйлав паллине кӑтартакан палла мӗнрен те пулин (анчах час пӑсӑлакан япаларан мар) ӑсталамалла. Унӑн 40 сантиметр ҫӳллӗш таран пулмалла.

Конкурс чӳк уйӑхӗн 10-мӗшӗччен иртӗ

Ҫӗнтерӳҫӗсене парнепе хавхалантарӗҫ.

vzsar.ru сайтри сӑн

Канаш муниципаллӑ округӗнчи Ҫӗнӗ Ахпӳрт ялӗнче урнӑ чир тупса палӑртнипе карантин пулнине ҫирӗплетнӗ.

Патшалӑх ветеринари служби пӗлтернӗ тӑрӑх, ҫак ялта ӗне урнӑ чирпе аптӑрани палӑрнӑ. Кайран выльӑх вилнӗ. Малтанлӑха пӗлтернӗ тӑрӑх, ӗне урнӑ чире тилӗрен ертнӗ.

Халӗ ҫак территорире чӗрчунсене вакцинаци тӑваҫҫӗ. Карантин вӑхӑчӗ тухиччен ҫак тӑрӑха килме юрамасть.

ҪҪХПИ тунӑ сӑн

Полицейскисем ӳсӗр водителе тытса чарма пулӑшнӑ арҫынна тав туса парнепе хавхалантарнӑ.

Юпа уйӑхӗн 23-мӗшӗнче «Шупашкар – Сӑрҫи» автоҫул ҫинче «тӑваттӑмӗш» модель водителӗ эвакуатор умне тухса авариллӗ лару-тӑру туса хунӑ. Ҫакна курнӑ тепӗр водитель кун пирки ҪҪХПИе пӗлтернӗ. Ку кӑна мар – пакунлисем ҫитиччен ҫав водитель хыҫҫӑн пынӑ.

Лешне тытса чарнӑ. Анчах вӑл ӳсӗррипе ӳсӗр маррине тӗрӗслеме тест витӗр тухма килӗшмен. 65 ҫулти арҫынна куншӑн правасӑр хӑварма, штраф тӳлеттерме пултараҫҫӗ.

карполь.рф сайтри сӑн

Чӑваш Енре «Госуслуги. Дом» сарӑм ӗҫлеме пуҫланӑ. Унччен вӑл 17 регионта сӑнав шайӗнче ӗҫленӗ. Халӗ вара унпа ҫӗршывра пурӑнакансем пурте усӑ курма пултараҫҫӗ.

Нумай хваттерлӗ ҫуртсенче пурӑнакансемшӗн вӑл питӗ меллӗ. Унта коммуналлӑ тӑкаксемшӗн тӳлеме, счетчик кӑтартӑвӗсене пама пулать. Ҫавӑн пекех управляющи компанине зявка яма май пур.

ШӖМ тунӑ сӑн

Комсомольски муниципаллӑ округӗнчи Ҫӗнӗ Выҫли ялӗнчи 59 ҫулти арҫын тӑватӑ юман каснӑшӑн явап тытӗ.

Вӑрман ӗҫченӗсем тӑватӑ тунката пуррине юпа уйӑхӗн 18-мӗшӗнче асӑрханӑ. Кун пирки вӗсем полицие пӗлтернӗ.

Йӗрке хуралҫисем ҫывӑхри ялсене ҫитнӗ. Ҫӗнӗ Выҫли ялӗнче пӗр ҫурт патӗнче вӗсем тин кӑна тунӑ йывӑҫ настил пуррине асӑрханӑ. Юман вӑрри ҫапла тупӑннӑ та.

Арҫын тӗлӗшпе пуҫиле ӗҫ пуҫарнӑ.

Ольга трукай страницинчен илнӗ сӑнӳкерчӗк

Чӑваш патшалӑх ӳнер музейӗнче чӑваш халӑх художникӗн Станислав Юхтарӑн куравӗ уҫӑлнӑ. Кун пирки Ольга Туркай радиожурналист тӗнче тетелӗнчи хӑйӗн страницинче пӗлтернӗ. «Чуна ҫӗклекен, шухӑшлаттаракан, тыткӑнлакан ӗҫсем. Юхтар — космос!» — тесе ҫырнӑ вӑл.

Аса илтерер: Станислав Юхтар — Чӑваш Республикин тава тивӗҫлӗ художникӗ, Раҫҫей художникӗсен союзӗн членӗ, Нестер Янкас тата Ҫеҫпӗл Мишши ячӗллӗ премисен лауреачӗ. Вӑл – республикӑри паллӑ иллюстраторсенчен пӗри пулнӑ май чӑваш ҫыравҫисен нумай кӗнекине хӑйӗн ӳкерчӗкӗсемпе илемлетнӗ.