cap.ru сайтри сӑн

Чӑваш Республикинчи амӑшӗн капиталне 2030 ҫулхи раштавӑн 31-мӗшӗччен пама йышӑннӑ. Ку ыйтӑва ЧР Министрсен Кабинечӗн ларӑвӗнче сӳтсе явнӑ.

Унччен ку пулӑшу мери 2026 ҫулхи раштавӑн 31-мӗшӗччен вӑйра пулнӑ. Кӑҫалхи кӑрлачӑн 1-мӗшӗнчен республикӑри амӑшӗн капиталӗ 200 пин тенкӗпе танлашать.

Палӑртмалла: республикӑри амӑшӗн капиталне 2012 ҫултанпа пама тытӑннӑ. Ун чухне вӑл 100 тенкӗе танлашнӑ. Ку таранччен амӑшӗн капиталне 17487 ҫемье тивӗҫнӗ.

ШӖМ тунӑ сӑн

Красноармейски округӗнчи Вӑрманкас ялӗнче 84 ҫулти кинемей ҫухалнӑ. Вӑл ӑс-тӑнпа арпашать, туяпа аран ҫӳрет. Хӑш чухне канӑҫсӑрлансан килтен аякка кайма пултарать.

Малтан кинемее тӑванӗсем хӑйсемех шыранӑ, анчах тупайман. Ҫур ҫӗр иртни 2 сехетре полицирен пулӑшу ыйтма тивнӗ.

Малтан оперативниксем тавралӑхра шыранӑ. Кайран вырӑна Артем Артемьев кинолог нимӗҫ овчаркипе Арчипе килнӗ. Йытӑ йӗр ҫине ӳкнӗ те ҫухрӑм ҫурӑ кайса кинемее тупнӑ. Ватӑскере хӑратас мар тесе кинолог йытта ун ҫывӑхне яман. Кинемее киле мӑнукӗсем ҫавӑтса кайнӑ.

pikabu.ru сайтри сӑн

Етӗрне округӗнче пурӑнакан арҫын ятарлӑ ҫар операцийӗнче пуҫ хунӑ салтакӑн картти ҫинчи 6 млн ытла тенке илсе катер, ҫуртне юсама стройматериалсем туяннӑ, кредичӗсене татнӑ. Халӗ унӑн куншӑн явап тытма тивӗ.

Амӑшӗ ывӑлӗн картти ҫинче укҫа ҫуккине еткерлӗхе йышӑннӑ чухне асӑрханӑ. Вӑл прокуратурӑна каса пулӑшу ыйтнӑ. Кайран ҫакӑ тӑрӑ шыв ҫине тухнӑ: салтак отпуска килсен карттӑна аякри тӑванне упрама панӑ иккен. Ку вара салтак вилнине пӗлсен амӑшне картта пирки нимӗн те шарламан, унти укҫана пӗчӗккӗн-пӗчӗккӗн илсе пынӑ.

mintrud.cap.ru сӑнӳкерчӗкӗ

Елчӗкри Ирина Еремеева патшалӑх пулӑшӑвӗпе хӑйӗн ӗҫне пуҫарса янӑ.

Хӗрарам социалла контраткпа килӗшӳллӗн паракан укҫана илнӗ, унпа вӑл маникюр пӳлӗмӗ уҫнӑ.

Малтанласа Ирина хӑйӗн чӗрнине сӑрланӑ, унтан ҫак ӗҫе тӗрӗс пурнӑҫлама хӑнӑхтаракан видеосем пӑхнӑ, ятарлӑ курсра вӗреннӗ. Унтан ал ҫак ӗҫе хӑнӑхса ҫитсен хӑйӗн ӗҫне пуҫарас тӗллев тытнӑ.

Патшалӑх контракчӗн укҫипе хӗрарӑм сӗтел-пукан, лампа, инстурментсемпе кирлӗ ытти япала туяннӑ.

Псков облаҫӗнче Тӑван ҫӗршывӑн Аслӑ вӑрҫинче хыпарсӑр ҫухалнӑ салтакӑн ут юлашкине тупнӑ. Халӗ унӑн тӑванӗсене шыраҫҫӗ.

Скрипченко Анатолий Григорьевич 1944 ҫулта хыпарсӑр ҫухалнӑ. Вӑл Ленинград тата 3-мӗш Прибалтика фрончӗсенчен ҫапӑҫнӑ. 1944 ҫулта 128-мӗш дивизи Псков облаҫне ирӗке кӑларнӑ ҫӗре хутшӑннӑ. Архив даннӑйӗсем тӑрӑх, дивизи нумай салтака ҫухатнӑ.

Скрипченко Анатолий вӑрҫа 1942 ҫулта Канашран кайнӑ. Унӑн мӑшӑрӗ Анна Яковлевна Канашри 3062-мӗш госпитальте медсестрара ӗҫленӗ. Вӗсен пӗр хӗр пулнӑ. Анатолий Григорьевич вилни пирки амӑшне 1944 ҫулхи ҫурла уйӑхӗнче пӗлтернӗ, унта ывӑлӗ ҫурлан 10-мӗшӗнче вилнини хыпарланӑ.

«Чеб.ру» сайтри сӑн

Ҫу уйӑхӗн 23-мӗшӗнче Патӑрьелте шаплатнӑ сасӑ илтӗннӗ. Ҫынсем хӑраса кайнӑ, кун пирки йӗрке хуралне пӗлтернӗ.

Кун хыҫҫӑн ҫулсене пӳлнӗ, тӗрӗслев пуҫарнӑ.

Мӗн пулнӑ-ха унта? Патӑрьелти пӗр ҫурт никӗсӗ аннӑ иккен. Ҫавна май темиҫе чӳрече ҫурӑлнӑ.

Йӗрке хуралҫисем вырӑна тӗрӗслесен нимӗнле сирпӗнекен хатӗр те тупман. Патӑрьел администрацийӗ пӗлтернӗ тӑрӑх, лару-тӑрӑва куҫран вӗҫӗртмеҫҫӗ.

Ҫак кунсенче Улатӑрта Мускав урамӗпе Октябрь Революцийӗн тӳремӗ пӗрлешнӗ ҫӗрте МиГ-29 истребителе постамент ҫине вырнаҫтарнӑ.

Самолета хулана ҫу уйӑхӗн 19-мӗшӗнче илсе ҫитернӗ, ҫав кунах ӑна пуҫтарма тытӑннӑ. Кайран сӑрласа постамент ҫине вырнаҫтарнӑ.

Сӑмах май, Улатӑрта Тӑван ҫӗршывшӑн Аслӑ вӑрҫи пуҫланиччен аэроклуб пулнӑ. Вӑрҫӑ вӑхӑтӗнче хулара 46-мӗш саппас авиаци полкӗ вырнаҫнӑ.

СССР Геройӗ Федот Орлов

Шупашкарти тата Етӗрнери ҫуртсен стени ҫине муралсем ӳкерме палӑртнӑ. Унта ентешсен, Совет Союзӗн Геройӗсен сӑнӗсене ӳкерӗҫ. Ӗҫе Республика кунӗ тӗлне вӗҫлӗҫ. Етӗрнере Федот Орловпа Евсигний Пайгусов сӑнӗсене ӳкерӗҫ. Шупашкарти пӗр ҫурт стенине вара Александр Боголюбовӑн сӑнӗ илемлетӗ.

Ку - Анжелика Ивановӑн проекчӗ. Унӑн ӗҫӗ культура пуҫарӑвӗсен Президент фончӗн грантне ҫӗнсе илнӗ.

Муралсене ҫамрӑк мӑшӑр Ксения Кокель тата Дмитрий Чапай ӳкерӗ.

pravdapfo.ru сӑнӳкерчӗкӗ

Улатӑрта ҫынсене коммуналлӑ пулӑшушӑн ытларах тӳлетттернӗ. Пӑтӑрмаха вырӑнти прокуратура ҫирӗплетсе панӑ.

Ӑшӑшӑн нумай тӳлеме тивни пирки надзор органне ҫынсем систернӗ. Хайхисем евитленӗ тӑрӑх, вӗсен килӗнче газ счётчикӗсем пур, анчах ресурспа тивӗҫетерекен «Чӑвашгаз» организаци нормативпа тӳлеме хистенӗ. Прокуратура тӳлеве ҫӗнӗрен шутласа пама хистенӗ. Нормативпа тата счётчикпа тӳленин уйрӑмлӑхӗ 1,3 миллион тенӗрен иртнӗ.

Ҫӗмӗрлере ачасем халӗ журналистика вӑрттӑнлӑхӗсене те вӗренме пултараҫҫӗ. Унта ача-пӑча журналистикин ҫурчӗ уҫӑлнӑ.

Ӑна Ҫӗмӗрлери хушма вӗренӗве аталанма пулӑшакан «Пултарулӑх – ачасене» ыр кӑмӑллӑх фончӗ, ЧР Экономика аталанӑвӗн министерствин гранчӗ тата Президент гранчӗсен фончӗ пулӑшнипе уҫнӑ. Халӗ унта ачасене медиа тӗнчипе паллаштараҫҫӗ.