Ҫӗртмен 20-21-мӗшӗсенче К.В. Иванов ячӗллӗ Чӑваш патшалӑх академи драма театрӗнче мордва писателӗн пьеси тӑрӑх лартнӑ спектакле, «Куйкарӑш» ятлӑскере, кӑтартӗҫ.
Режиссерӗ – Раҫҫей, Азербайджан, Калмӑк тата Тыва республикисен искусствӑсен тава тивӗҫлӗ деятелӗ Борис Манджиев. Пьеса авторӗ - Мордва Республикин тава тивӗҫлӗ писателӗ Валентина Мишанина.
Сюжет кӑсӑклӑ: Петӗркке ятлӑ старик кӗтмен ҫӗртен Куйкӑрӑш хуҫи пулса тӑрать. Ырлӑх курас вырӑнне унӑн пурнӑҫӗ тӗпрен улшӑнать - ӑна мистикӑллӑ тата тӗлӗнтермӗш пулӑмсем кӗтеҫҫӗ.
«Куйкӑрӑш» камит чӑваш фольклорӗпе, мистикӑпа тата халӑх кӗввисемпӗ пуян.
К.В.Иванов ячӗллӗ Чӑваш патшалӑх академи драма театрӗ 40 ҫул иртсен «Нарспи» спектакле сцена ҫине тепӗр хут кӑларма палӑртнӑ. Ахальтен мар. Кӑҫал поэма авторӗ Константин Иванов ҫуралнӑранпа 130 ҫул ҫитет.
Премьера авӑн уйӑхӗн 26-мӗшӗнче пулӗ. Ӑна Чӑваш Республикин Элтеперӗн гранчӗпе лартаҫҫӗ.
Спектакль режиссерӗ – Адыгейӑра ҫуралнӑ, ГИТИСра вӗреннӗ Данна Афаунова. Вӑл унччен Ингушетири, Тутарстанри театрсенче спектакльсем лартнӑ.
К. В. Иванов ячӗллӗ Чӑваш патшалах академи драма театрӗн гример-постижерне Наташа Спиридоновӑна «Чӑваш Республикин культурӑн тава тивӗҫлӗ артисчӗ» ят панӑ.
Хисепле вулаканӑмӑрсем, Наташа тенинчен тӗлӗнме кирлӗ мар, Наташа Спиридонова тесе ӗҫлӗ хутра ҫырнӑ.
Сӑмах май каласан, ҫав ӑста 2023 ҫулта ӳкернӗ кӗске метрлӑ «Пиртен пӗри» фильмри артистсене те сӑрласа ҫӗнӗ сӑнарпа ҫывӑхлатнӑ.
Ҫӗртмен 24-мӗшӗнче, Республика кунӗнчӗ, «Раҫҫейӗн хальхи музыка карттипе» паллаштарӗҫ. Ҫапла регионсенчи юрӑ-кӗвӗпе киленме май пулӗ.
Халӗ кашни регионта суйлав тапхӑрӗ иртет, хӑш юрӑпа паллаштармаллине палӑратаҫҫӗ.
Чӑваш Енрен вара ку проекта Дмитрий Тетель композитор, саксофонист хутшӑнать. Вӑл чӑваш халӑхӗн виҫӗ юррине пӗрлештерекен музыка хайлавӗпе паллаштарӗ. Унта «Вӗҫ-вӗҫ, куккук», «Алран кайми», «Ташши, ташши» юрӑсем кӗнӗ.
Увертюрӑна шӑпах Республика кунӗнче итлеме май пулӗ те.
Николай Семёновпа Зоя Илларионова режиссерсем ӳкернӗ «Парӑм» фильма Шупашкарта иртекен Пӗтӗм тӗнчери кинофестиваль программине кӗртнӗ. Тӗп роле Зоя Илларионова калӑплать. Ӑна ыран, ҫy yйӑхӗн 26-мӗшӗнче, Ҫамрӑксен театрӗн пысӑк залӗнче 18:00 сехетре курма май пулать. Тӳлевсӗрех кӗртеҫҫӗ.
Сюжечӗ интереслӗ: хӗрарӑма тухтӑpceм усал шыҫӑ атланнине пӗлтернӗ. Вӑл вара вилнӗ амӑшне тӗлӗкре пӗрмай курать. Лешӗ парӑма татма тата анатри чӑвашсен йӑлине пӑхӑнма ыйтать.
Шупашкарти кивӗ пӗр ҫуртра Николай Ашмарин ӑсчахӑн ал ҫырӑвӗсене тупнӑ. Кун пирки Чӑваш Енӗн патшалӑх телерадиокомпанийӗ пӗлтерет.
Николай Ашмарин — паллӑ лингвист, этнограф, 17 томлӑ чӑваш чӗлхи словарӗн авторӗ.
Хулари пасар урамӗнчи ҫурт унчченхиллех упранса юлнӑ. Унта ученӑй Шупашкара килсен чарӑнса тӑнӑ.
Ивановсем 2019 ҫулта ҫав ҫурта туяннӑ, кайран ӑна йӗркене кӗртме тытӑнсан мачча тӑрринче хутсемпе сӑнӳкерчӗксем, алырусем асӑрханӑ.
Хутсене ӗненсен, ҫуртӑн пӗрремӗш хуҫи сӑра вӗретекен завод директорӗ пулнӑ. Кайран ҫав ҫурта Емельян Захаров туяннӑ, вӑл Николай Ашмаринпа пӗр шухӑшлӑ ҫын пулнӑ.
100 ҫул ларакан йывӑҫ пӳртре Ашмарин Шупашкара килсен ларса ӗҫленӗ сӗтел те пур-мӗн.
Чӑваш Енре пурӑнакан ҫамрӑксене ялта культура сферинче ӗҫлеме йыхравлаҫҫӗ. Республикӑн Культура институтӗнче вӗренекен ҫамрӑксем ҫав тӗллевпе ятарласа тӗлпулу ирттернӗ.
«Земствӑри культура ӗҫченӗ» федераци программине кӑҫал пирӗн республикӑра 8 ҫын хутшӑнаять. Вӗсене чӳк уйӑхӗн 1-мӗшӗ тӗлне пӗрер миллион тенкӗ парӗҫ.
Конкурса хутшӑнмалли заявкӑсене республикӑн Культура министерствинче утӑ уйӑхӗн 15-мӗшӗччен йышӑнӗҫ.
Паян Шупашкарта Пӗтӗм тӗнчери кинофестиваль уҫӑлнӑ.
Кӑҫал унта Раҫҫейри тӗрлӗ регионти, Беларуҫри, Казахстанри, Таджикистанри, Узбекистанри, Сербири, Иранри, Индири, Бангладешри ӗҫӗсем хутшӑнаҫҫӗ. Пӗтӗмпе – 40 фильм. Вӗсенчен 6-шӗ – Чӑваш Енри кинематографистсем хатӗрленӗскерсем.
Кинофестиваль «Ҫӗнтерӳ» сериалпа пуҫланнӑ. Ӑна Ҫеҫпӗл Мишши ячӗллӗ ҫамрӑксен театрӗнче кӑтарнӑ.
Фестиваль ҫу уйӑхӗн 28-мӗшӗнчен пулӗ. Фильмсене тӳлевсӗр кӑтартаҫҫӗ.
Чӑваш Ене Театр теплохочӗ килӗ. Вӑл пирӗн патӑмӑрта ҫу уйӑхӗн 31-мӗшӗнче пулӗ.
Атӑлҫи тӑрӑхӗнчи пилӗк хулара «ГИТИСFEST. Театральное Приволжье 2025» фестиваль-лаборатори ӗҫлӗ.
«А.С. Попов» теплоходпа ГИТИС педагогӗсемпе режиссёрӗсем килӗҫ, вӗсем ҫамрӑк актерсене ӑсталӑха тарӑнлатма тата анлӑлатма вӗрентӗҫ. Лабораторие Атӑлҫи тӑрӑхӗнчи 14 регионти театр учрежденийӗсенче ӑс пухакан ҫамрӑксем хутшӑнӗҫ.
Фестиваль-лаборатори Чулхулара, Шупашкарта, Хусанта, Самарӑра тата Сартура иртӗ. Пирӗн патра вӑл Чӑваш академи драма театрӗнче ӗҫлӗ.
Олег Прокопьевӑн кӗнеки кун ҫути курнӑ. Кун пирки «Пуринчен малтан» телеграм-канал пӗлтерет.
Кӗнеке «Чӑвашӑм, пурӑн!» ятлӑ, унта сӑвӑсем кӗнӗ. Вӑл тин кӑна, ҫак кунсенче, Чӑваш кӗнеке издательствинче пичетленсе тухнӑ.
Автор сӑвӑсене сакӑр ушкӑна пайласа вырнаҫтарнӑ: «Ялти тӗрленчӗксем», «Юрату тата ырату», «Тӗрӗслӗх шыравӗ», «Тивӗҫ», «Юратупа эс килтӗн тӗнчене», «Тухату», «Витӗркуру – асӑрхаттару».
Палӑртмалла: ку – Олег Прокопьевӑн иккӗмӗш кӗнеки. Пӗрремӗшӗ «Шыв ҫинчи сар хӗвел ҫулӗпе» ятлӑ, вӑл 2008 ҫулта пичетленсе тухнӑ.
+8.3 °C