Иртнӗ эрнекун К.В. Иванов ячӗллӗ Чӑваш патшалӑх академи драма театрне Раҫҫей тава тивӗҫлӗ, Чӑваш халӑх артистки Валентина Трифонова сцена искусствине кӑмӑллакансене пуҫтарчӗ. Юбилей каҫне пултарулӑх ушкӑнӗсем, уйрӑм артистсем, культура ӗҫӗн ветеранӗсем хутшӑнчӗҫ.

…Экран ҫинче чылай ҫул каялла куракансене пӑлхантарнӑ сӑнарсем пӗрин хыҫҫӑн тепри улшӑнса пыраҫҫӗ. Акӑ ытарайми Сафия («Алхасуллӑ ҫамрӑклӑх», А. Абдулин), тӳрӗ кӑмӑллӑ, ачаш Ахахпи («Сан ятупа», П. Афанасьев), канӑҫсӑр Майя («Ашшӗ, амӑшӗ, ачисем», Г. Хухавили), ҫемҫе кӑмӑллӑ София («Телейсӗрскер» И. Тоболевич)… Вӗсенчен кашнинех актриса хӑнӑхнӑ меслетсемпе мар, пурнӑҫа лайӑх сӑнаса, автор уҫса кӑтартнӑ самантсене пур енлӗн шута илсе калӑпланӑ, ҫавӑнпа вӗсем тарӑн та ӑнланмалла пулса тухнӑ.

Ҫакна тухса калаҫакансенчен нумайӑшӗ, ку шутра театрӑн директорӗ Елена Николаева та, палӑртса хӑварчӗ.

– 1967 ҫулта эпир, вунсакӑр каччӑпа хӗр, театр ӑсталӑхне вӗренме тухса кайрӑмӑр, – тет Ленинградри театр, музыка тата кино институтӗнчен вӗренсе тухнӑ Владимир Бурмистров.

Малалла...

cap.ru сӑнӳкерчӗкӗ. Архивран

«Пуринчен малтан» телеграм-канал хыпарланӑ тӑрӑх, паян Шупашкарта «Кӗмӗл сасӑ» фестиваль иртнӗ.

Йӑлана кӗнӗ пултарулӑх конкурсне Чӑваш Енри кӑна мар, Тутарстанри, Пушкӑртстанри тата Пенза облаҫӗнчи ҫамрӑк юрӑҫсем те хутшӑннӑ.

Чи маттурри Елчӗк округӗнчи Виктория Романова пулнӑ, вӑл гран-прие тивӗҫнӗ. Ӑна санаторире 15 кун канмалли путевка панӑ.

«За рулем» порталти сӑн

Ака уйӑхӗн 25-мӗшӗнче 21 сехет те 49 минутра Ҫӗрпӳ округӗнчи Ҫамрӑксен поселокӗ ҫывӑхӗнче «Чанган» иномарка ВАЗ-2112 магина ҫине пырса кӗнӗ. ВАЗ водителӗ, 20-ри каччӑ, вырӑнтах вилнӗ. 2002, 2005 тата 2006 ҫулсенче ҫуралнӑ пассажирсем аманнӑ.

Ҫакӑ паллӑ: иномарка водителӗ ӳсӗр пулнӑ. Полицейскисем ҫитиччен ӑна пульницӑна илсе кайнӑ. Ҫак машина – Красноармейски округӗн пуҫлӑхӗ пулнӑ Борис Клементьевӑн. 2023 ҫулхи акан 21-мӗшӗнче, хӑйӗн ҫуралнӑ кунӗ хыҫҫӑнах, отставкӑна янӑ.

Александр Кузнецов страницинчен илнӗ сӑнӳкерчӗк

Темиҫе сехет каялла Ҫӗмӗрлене Ҫӗнтерӳ пуйӑсӗ килсе ҫитнӗ. Кун пирки Чӑваш Енӗн вырӑнти хӑйтытӑмлӑх органӗсен ассоциацийӗнче ӗҫлекен Александр Кузнецов халӑх тетелӗнчи хӑйӗн страницинче пӗлтернӗ.

Пуйӑса кӗтсе илме халӑх йышлӑ пуҫтарӑннӑ.

Аслӑ Ҫӗнтерӗве 80 ҫул ҫитнӗ май Чулхулари чукун ҫул мемориаллӑ ретропоезд йӗркеленӗ.

Пуйӑс ака уйӑхӗн 23-мӗшӗнче Чулхуларан ҫула тухнӑ.

Вӑл Чулхула тата Киров облаҫӗсенче, Чӑваш Енре, Мари Элта, Тутарстанра тата Удмурт Республикинче чарӑнӗ.

Чӑваш патшалӑх ҫамрӑксен театрӗн сӑнӳкерчӗкӗ

Ҫак эрнере Чӑваш патшалӑх

ҫамрӑксен театрӗнче «Ҫӑкӑр чӗлли» драма кӑтартнӑ. Пьеса авторӗ — Ева Лисина прозаик.

Театрта пӗлтернӗ тӑрӑх, Ева Лисина Тӑван ҫӗршывӑн аслӑ вӑрҫи хыҫҫӑнхи ҫулсенче выҫӑпа вилнӗ ачасене асӑнса «Ҫӑкӑр чӗлли» калав ҫырнӑ.

«Ашшӗсӗр тӑрса юлнӑ ҫемьен йывӑр пурнӑҫӗ калавра хӗрача куҫӗпе уҫӑлса пырать. Ҫула май чӑваш халӑхӗн наци характерӗ те курӑнсах тӑрать кунта.

Вӑрҫӑ хыҫҫӑнхи чӑваш ялӗн выҫӑллӑ-тутӑллӑ пурнӑҫне кӑтартнӑ май писательница ҫав вӑхӑтри йывӑрлӑхсене, пӗчӗк хӗрача ҫӑкӑршӑн ҫав тери тунсӑхланине кӑтартса парать.

«Ҫут тӗнчере савӑнӑҫпа хурлӑх пӗр тан валеҫӗнес пулсан, ман ҫӗршывӑм тахҫанах ырӑлӑхра пурӑнмалла», – пӗтӗмлетсе калать автор вӗҫӗнче», — хыпарланӑ театрта.

morgau.cap.ru сӑнӳкерчӗкӗ

Муркашра нумаях пулмасть Юрий Жуковӑн концерчӗ иртнӗ. Пултаруллӑ ҫыннӑн 75 ҫулхине халалланӑ мероприятие зал тулли халӑх пуҫтарӑннӑ. Вырӑнтисем хыпарланӑ тӑрӑх, зал концерт пуҫланиччен ҫур сехет маларахах лӑк тулли пулнӑ.

Юрий Нестерович 1950 ҫулхи ака уйӑхӗн 17-мӗшӗнче ҫуралнӑ. Вӑл — композитор, баянист, педагог, Чӑваш Республикин культурӑн тава тивӗҫлӗ ӗҫченӗ, Муркаш районӗн хисеплӗ ҫынни.

Юбиляра район администрацийӗн культура тата архив ӗҫӗн пайӗн пуҫлӑхӗ Любовь Рыжкова саламланӑ.

Сумлӑ композитора саламлама пырса ҫитнисем хушшинче Чӑваш патшалӑх юрӑпа таша ансамбльне нумай ҫул ертсе пынӑ Раҫҫӗй халӑх артисчӗ Юрий Васильев та пулнӑ.

Инкеклӗ лару-тӑру министерстви тунӑ сӑн

Ӗнер, ака уйӑхӗн 24-мӗшӗнче, Пӑрачкав округӗнчи Кожевенное ялӗ ҫывӑхӗнче вӑрман ҫунма тытӑннӑ. Ҫулӑм 3 гектар лаптӑк ҫинче сарӑлнӑ. Пушарнӑйсем «хӗрлӗ автана» часах парӑнтарнӑ. Инкекре ҫынсем шар курман.

Инекеклӗ лару-тӑру министерстви вӑрмансенче пушар тухас хӑрушлӑх пысӑк пулни пирки аса илтерет.

Тӗп ставка 21 процентах юлӗ. Ҫапла палӑртнӑ паян Раҫҫей банкӗн директорсен канашӗн ларӑвӗнче.

Кун пек ставка пӗлтӗрхи юпа уйӑхӗнченпех пулнӑ. Унтанпа 4 лару иртнӗ: раштавра, нарӑсра, пушра тата паян. Ставкӑна унчченхи шайрах хӑварма йышӑннӑ.

Малтанлӑха пӗлтернӗ тӑрӑх, кӑҫал тӗп ставка 19,5-21 процент пулӗ. 2026 ҫулта 14-14 процента ҫитмелле.

«Гама» круиз компанийӗ тунӑ сӑн

Ака уйӑхӗн 26-мӗшӗнче Шупашкарта ку сезонра туристсен теплохочӗ пӗрремӗш хут чарӑнӗ. Вӑл – «Алдан».

Теплоход паян кӑнтӑрла хыҫҫӑн Чулхуларан тухнӑ. Ыран ирхи 8 сехетре вӑл Шупашкарта чарӑнӗ. Кунта вӑл 4 сехет тӑрӗ те каялла кайӗ, ҫула май Козьмодемьянск хулинче 2 сехетлӗхе чарӑнӗ. Чулхулана теплоход вырсарникун ирхи 10 сехетре таврӑнӗ. Тепрехинче «Алдан» Костромаран тухса Шупашкарта ҫу уйӑхӗн 1-мӗшӗнче чарӑнӗ.

Вера Иванова сӑнӳкерчӗкӗ

Чӑваш чӗлхине сарас, унӑн сумне ӳстерес, тӑван халӑх культурине хисепе хума вӗрентес тӗллевпе культура тата вӗренӳ учрежденийӗсем ҫеҫ мар, кирек мӗнле хастар та хӑйӗн тӳпине хывма пултарать.

Шупашкар хулинчи халӑхӑн социаллӑ ыйтӑвӗсене тивӗҫтерекен центр «Контактри» хӑйӗн страницинчен чӑвашла ӳкерсе илемлетнӗ турилккесене выляттарать. Черетлӗ вылява паян, Чӑваш чӗлхи кунӗнче, пӗтӗмлетнӗ. Хальхинче турилккене Светлана Гордеева ҫыравҫӑ тата ӳнерҫӗ ҫӗнсе илнӗ. Илемлӗ турилккене унччен Крымра пурӑнакан арҫын патне ӑсатнӑ.

«С Днём чувашского языка! Тӑван чӗлхене юратар, манар мар, туссем! Ачасене те чӑвашлах вӗрентер. Пӗр чӗлхе — пӗр ӑс, икӗ чӗлхе — икӗ ӑс, виҫӗ чӗлхе — виҫӗ ӑс», — тесе ҫырса хунӑ учреждени конкурса пӗтӗмлетнӗ май.