cap.ru сайтри сӑн

Ҫитес ҫул, 2027 ҫулта, Республика кунӗ йӑлана кӗнӗ тӑрӑх Шупашкар хулинче тата Елчӗк районӗнче иртӗ. Чӑваш Ен Элтеперӗн администрацийӗ указ проектне хатӗрленӗ.

Документра палӑртнӑ тӑрӑх, муниципалитет пӗрлешӗвӗсен конкурсӗнче Республика кунне уявлама Шупашкарсӑр пуҫне Елчӗк округӗ тивӗҫнӗ. Вырӑнти хӑй тытӑмлӑх органӗсене 2027 ҫулта Акатуй тата Сабантуй, йӑлана кӗнӗ ытти мероприятие ирттерме сӗннӗ, Министрсен Кабинетне вара Елчӗк округӗнчи ялсенчи общество инфратытӑмне аталантарма грант пама.

Аса илтерер: кӑҫал Республика кунӗ Шупашкар хулинче тата Шупашкар округӗнче иртнӗ.

Культура министерствин сӑнӳкерчӗкӗ

Иртнӗ эрнере, юпа уйӑхӗн 15-мӗшӗнче, Чӑваш Енӗн Культура, национальноҫсен ӗҫӗсен тата архив ӗҫӗн министерствинче Общество канашӗн йӗркелӳ ларӑвӗ иртнӗ. Унта председатель, председателӗн ҫумне суйлас тата яланхи комиссисен йышне палӑртас ыйтӑва пӑхса тухнӑ.

Общество канашӗн ларӑвне пухӑннисем уҫҫӑн сасӑласа председатель пулма Нина Смирновӑна ҫирӗплетнӗ. Ку хӗрарӑм «Радуга» культурӑпа курав центрне ертсе пырать. Унӑн ҫумӗ пулма Чӑваш Енри Театр ӗҫченӗсен союзӗн председателӗн ҫумне Зоя Яковлевӑна шаннӑ.

Общество канашӗнче пурӗ 11 ҫын иккен. Вӗсен йышӗнче Раҫҫейри писательсен союзӗн регионти уйрӑмӗн председателӗн ҫумӗ Ольга Куликова та пур. Ольга Куликова — хальхи вӑхӑтри паллӑ чӑваш писателӗсенчен пӗри.

«Контактри» сӑн

Красноармейски округӗнче «Тутлӑ!» фестиваль иртнӗ. Ӑна «Ялта пурӑнма аван» конкурспа килӗшӳллӗн йӗркеленӗ.

Фестивальте финала тухнӑ ултӑ команда тупӑшнӑ: Карай, Вӑрманкас, Яманак, Упи, Пӑрӑнтӑк тата Йӗпрем ялӗсем. Вӗсем вырӑнти кухня апат-ҫимӗҫӗпе паллаштарнӑ, жюри вара хакланӑ.

Сӗтел апат-ҫимӗҫрен йӑтӑннӑ: пулӑ тата аш-какай деликатесӗсем, хуплу, хуран кукли, кавӑн ӑшӗнче пӗҫернӗ пӑтӑ, вӗлтӗренрен тата хыр йӗкелӗсенчен вӗретнӗ варени, курӑк чейӗсем… Ҫав вӑхӑтрах такмаксем юрласа, шӳтсем каласа савӑннӑ.

Ӗҫленине кура пурне те хавхалантарнӑ: кашни финалистах 5-шер пин тенкӗ панӑ.

forum.na-svyazi.ru порталтан илнӗ сӑнӳкерчӗк

Чӑваш Енре культура эткерлӗхӗ шутланакан ҫуртсенчен пӗрне сутаҫҫӗ. Сӑмах май каласан, ун пек ҫуртсем тӗрлӗ тӑрӑхра пур. Вӗсем Сӗнтӗрвӑрринче, Улатӑрта нумай. Анчах чылайӑшне юсаса ҫӗнетмелле.

3 миллион тенкӗпе сутма йышӑннӑ ҫурт — Пӑрачкаври учительсен семинарийӗ.

Ку ҫурт федераци пӗлтерӗшлӗ культура эткерлӗхӗ шутланать. Ӑна сутма ДОМ.РФ йышӑннӑ. Заявкӑсене чӳк уйӑхӗн 16-мӗшӗччен пухӗҫ, кама сутса яни чӳк уйахӗн 20-мӗшӗнче паллӑ пулӗ. Ҫӗнӗ хуҫан ҫуртӑн малтанхи сӑн-сӑпатне упраса хӑвармалла.

Икӗ хутлӑ кирпӗч ҫурта вырӑс классицизмӗн стилӗпе Пӑрачкав вотчинин хуҫи, Петр Салтыков граф пулнӑ. Таврапӗлӳҫӗсем ӗнентернӗ тӑрӑх, 1833 ҫулта унта Александр Пушкин кӗрсе тухнӑ. 1872 ҫулта Илья Ульянов Атӑлҫи тӑрӑхӗнче учительсен чи малтанхи семинарийӗсенчен пӗрне уҫнӑ. Заведени шкул валли кадрсене 1951 ҫулчченех хатӗрленӗ.

pravdapfo.ru сӑнӳкерчӗкӗ

Чӑваш Енӗн культура министрӗ Светлана Каликова юпа уйӑхӗн 9-мӗшӗнче хӑйӗн ирӗкӗпе ӗҫлеме пӑрахнине Чӑваш халӑх сайчӗ пӗлтернӗччӗ-ха. Ун хыҫҫӑн тепӗр кунне министр тивӗҫне вӑхӑтлӑха пурнӑҫлама Надежда Павловӑна ҫирӗплетнӗ. Тепӗр темиҫе кунтан, тата тӗрӗсрех каласан, юпа уйӑхӗн 16-мӗшӗнче, ку тивӗҫе пурнӑҫлама Татьяна Казаковӑна шаннӑ.

Татьяна Казакова — культура министрӗн пӗрремӗш ҫумӗ.

Сӑмах май каласан, вӑл культура министрӗн ҫумӗ пулса 2008-2016 ҫулсенче ӗҫленӗ, кайран Шупашкарти Кадет корпусӗн директорӗ пулса тӑнӑ, унтан Шупашкарти вулавӑшсен пӗрлешӗвӗнче те ӗҫленӗ. 2020 ҫулта каллех республикӑн Культура министерствинче ӗҫлеме пуҫланӑ. Халӗ ӑна яваплӑ ӗҫ хушнӑ — министр тивӗҫне пурнӑҫлама шаннӑ.

cap.ru/ сӑнӳкерчӗкӗ

Хӗрлӗ Чутай районӗнче пурӑнакан хӗрарӑма преми панӑ. Екатерина Походкина «Берегиня села» (чӑв. Ял управҫи) регионти премие тивӗҫнӗ. Хӗрарӑма «Хозяйка земли» (чӑв. Ҫӗр управҫи) номинацире чысланӑ. Ӑна 100 пин тенкӗ преми пама йышӑннӑ.

Екатерина Михайловна — тӑватӑ ача амӑшӗ. Вӑл — усламҫӑ. Упӑшкипе иккӗшӗ вӗсем пӗр пӗвене хӑйсен туса хунӑ та ҫавӑнта илемлетсе лартнӑ. Унта ларса канмалли илемлӗ кӗтес те пур, ярӑнмалли вырӑнсем те, хӳшӗ те. Пулӑ тытма юратакансем укҫа тӳлесен вӑлтапа пырса ларма пултараҫҫӗ.

Район администрацийӗн пресс-служби хӗрарӑма ырласа хӑйсен сайтӗнче пӗлтернӗ май ӑна асамҫӑпа танлаштарнӑ, унпа мӑнаҫланнине палӑртса хӑварнӑ. «Ку наградӑна эсир чӑннипех те тивӗҫ», — тесе ҫырнӑ.

«Ҫанталӑк 21» порталти сӑн

Чӑваш Республикинче ӑшӑ ҫанталӑк вӗҫленчӗ, паян сивӗтрӗ. Кун пирки сайтра иртнӗ эрнерех пӗлтернӗччӗ. «Ҫанталӑк 21» сайт ку эрнере мӗнле ҫанталӑк пулассине пӗлтернӗ.

Паян ирхине метеостанцири барометрсем 757 мм кӑтартнӑ, каҫ енне тепӗр 10 мм хӑпарма пултарӗ. Ҫавна май артери юн пусӑмӗ пысӑккипе аптӑракансем хӑйсене япӑхрах туяс хӑрушлӑх пур.

Паян пирӗн пата Арктика сывлӑшӗ килнӗ, ҫил те вӑйланнӑ. Ҫил ыран лӑпланӗ. Вара каллех ӑшӑ сывлӑш килме тытӑнӗ. Эрнен иккӗмӗш ҫурринче кӑнтӑрласерен 10-15 градус ӑшӑ, уяр пулӗ. Анчах ҫӗрлесерен тӑм ӳкме пултарӗ.

Малтанлӑха пӗлтернӗ тӑрӑх, кун пек ҫанталӑк уйӑх вӗҫӗчченех пулӗ. Чӳк уйӑхӗ те ытти чухнехинчен ӑшӑрах килес шанчӑк пур.

ФФККР архивӗнчи сӑн

Ӑмӑртусенче Чӑваш Республикин чысне хӳтӗлекен Камилла Нелюбова Раҫҫейри Гран-прире ылтӑн медаль ҫӗнсе илнӗ.

Аса илтерер: кӑҫалтан пӑр ҫинче эрешлесе ярӑнакан 18 ҫулти спортсменка тупӑшусенче Чӑваш Ен чысне хӳтӗлет. Ҫак кунсенче вӑл Хусанта иртекен Гран-прире кӗске программӑра иккӗмӗш вырӑн йышӑннӑ, хутӑш программӑра вара пуринчен те ирттерсе пьедесталӑн ҫулти картлашки ҫине хӑпарнӑ.

Палӑртса хӑварар: Камилла Нелюбова Краснодар крайӗнче ҫуралса ӳснӗ. Малтан ӑмӑртусенче вӑл хӑйсен регионӗшӗн тупӑшнӑ, унтан Мускав чысне хӳтеленӗ. Халӗ вара Шупашкарта Олимп резервӗсен 4-мӗш спорт шкулӗнче ӑсталӑхне туптать. Ҫапах та вӑл тренировкӑсене Мускаврах ирттерет.

Камиллӑн тренерӗсем Олимп чемпионӗсем Евгений Плющенко тата Аделина Сотникова пулнӑ, халӗ вара вӑл Дарья Гуреева тренер патӗнче ӑсталӑхне туптать.

cap.ru сайтри сӑн

Юпа уйӑхӗн 15-мӗшӗнче Комсомольскинчи культура ҫуртӗнче кадет класӗсен хушшинче «Кадетсем юрлаҫҫӗ» хор ӳнерӗн III фестивалӗ иртнӗ. Ӑна Комсомольскинчи 1-мӗш шкул «Воспитанин ҫӗнӗ философийӗ» федераци пуҫарӑвӗпе килӗшӳллӗн йӗркеленӗ. Мероприятие директорӑн воспитани енӗпе ӗҫлекен канашҫи йӗркелесе пынӑ.

Унта администраци ӗҫченӗсем, общество организацийӗсен тата ветерансен пӗрлешӗвӗсен элчисем ҫитсе курнӑ. Фестиваль репертуарне патриотлӑх тематикине халалланӑ. Сцена ҫинче Раҫҫей, салтаксен паттӑрлӑхӗ, кадетсен йӑли-йӗрки пирки юрӑсем янӑранӑ.

Елена Свинина вара хӑй ҫырнӑ сӑвӑсене вуласа уява татах пуянлатнӑ.

Жюри ҫӗнтерӳҫӗсене суйланӑ. Гран-прие Ҫӗрпӳри 2-мӗш шкул тивӗҫнӗ. 2-мӗш вырӑна Патӑрьелти 1-мӗш шккл, Вӑрнарти 2-мӗш шкул, Елчӗк округӗнчи Курнавӑшри шкул тухнӑ. 3-мӗш вырӑнта – Патӑрьел округӗнчи Шӑнкӑртамри шкул, Вӑрнар округӗнчи Нурӑсри шкул тата Комсомольскигчи 2-мӗш шкул.

Патшалӑх автоинспекцийӗ тунӑ сӑн

Чӑваш Республикинче каллех пӑшие ҫапса кайнӑ тӗслӗх пулнӑ. Хальлхинче – Ҫӗмӗрле округӗнче.

Ку юпа уйӑхӗн 17-мӗшӗнче ҫур ҫӗр иртни 20 минутра «Шупашкар – Сӑр» автоҫулӑн 103-мӗш ҫухрӑмӗнче пулнӑ. Пӑши ҫул ҫине чупса тухнӑ. Ҫав вӑхӑтра ҫул ҫинче ВАЗ2114 машина пынӑ.

22 ҫулти водитель тата икӗ пассажир – 2008 ҫулта ҫуралнӑ каччӑ тата 2010 ҫулта ҫуралнӑ хӗр – аманнӑ. Вӗсене пурне те пульницӑна илсе ҫитернӗ, пурте реанимацире выртаҫҫӗ, сывлӑхӗсем йывӑр. Халӗ Чӑваш Енри Патшалӑх атвоинспекцийӗ ку авари тӗлӗшпе тӗрӗслев ирттерет.

Аса илтерер: нумаях пулмасть Красноармейски округӗнчи Йӗпрем ялӗ ҫывӑхӗнче пӑши туристсен автобусӗ ҫапса кайнӑччӗ. Ун чухне, телее, никам та аманман.