Шупашкарти Ҫӗньял ял тӑрӑхӗн депутатсен пухӑвӗн депутачӗ хӑйӗн айӑпне пула урам тирпейлеме тухӗ. Унта унӑн, суд йышӑнӑвӗпе килӗшӳллӗн, 400 сехет ӗҫлемелле.

Суд тата следстви ҫирӗплетнӗ тӑрӑх, ҫак 49 ҫулти депутат 2018 ҫулхи ҫурла уйӑхӗн 25-мӗшӗнче хӑйсен ялӗнчи пӗр ҫынпа хирӗҫсе кайнӑ. Хайхискер ӑна кӗлеткин тӗрлӗ пайӗнчен ҫапнӑ, тапнӑ. Тепӗр кунхине депутат ҫав ҫынна каллех курнӑ. Хальхинче вӑл ӑна ҫӗҫӗпе хӑлаҫланса вӗлерессипе хӑратнӑ.

ЧР прокуратурин пресс-служби пӗлтернӗ тӑрӑх, депутата ҫын сывлӑхне юри сиен кӳнӗшӗн тата вӗлерессипе хӑратнӑшӑн айӑпланӑ.

Кӗҫех республикӑра «Ҫулталӑкри вӗрентекен» конкурс иртмелле. Муниципалитетсенче унта хутшӑнма хатӗрленеҫҫӗ, чи лайӑх педагогсене суйлаҫҫӗ.

Шупашкарта ҫак ята кам тивӗҫни паллӑ ӗнтӗ. Конкурс финалӗ ӗнер, пуш уйӑхӗн 29-мӗшӗнче, иртнӗ. Комисси ҫӗнтерӳҫе палӑртнӑ. Шупашкар хула администрацийӗн вӗренӳ управленийӗн пресс-служби хыпарланӑ тӑрӑх, кӑҫал Шупашкарта «Ҫулталӑкри вӗрентекен» ята 4-мӗш лицейре обществознанипе экономика предмечӗсене вӗрентекен Наталья Иванова тивӗҫнӗ.

Иккӗмӗш вырӑна 45-мӗш шкулта ачасене вырӑс чӗлхипе литературине вӗрентекен Татьяна Юдина тухнӑ. Виҫҫӗмӗш вырӑнта – 1-мӗш гимназин математика вӗрентекенӗ Ксения Коллэ.

Республикӑри наркологи диспансерӗн тӗп тухтӑрӗ тӗлӗшпе пуҫиле ӗҫ пуҫарнӑ. Вӑл должноҫӗпе усӑ курнине тӗрӗслев вӑхӑтӗнче тупса палӑртнӑ.

Тӗп тухтӑр йӗркене пӑсни электронлӑ аукциона тӗрӗсленӗ чухне тӑрӑ шыв ҫине тухнӑ: кӗске сроклӑ хаклӑ реагентсене учреждени валли туяннӑ. Анчах вӗсен пӗр пайӗпе усӑ курман, срокӗ тухса кайнӑ. Ҫавна май тӗп тухтӑр хаклӑ реагентсене коммерци организацине тупӑш тума палӑшас тӗллевпе туяннӑ тесе шутлаҫҫӗ. Диспансерпа организаци 2017 ҫулта килӗшӳ алӑ пуснӑ. Следстви шухӑшӗпе, ҫакна тӗп тухтӑр реагентсем кирлӗ мар пулсан та тунӑ. Тӑкак 2,5 миллион тенкӗпе танлашнӑ.

Аса илтерер, нумаях пулмасть ЧР Спорт министерствин финанспа экономика пай пуҫлӑхӗ, тӗп бухгалтерӗ тӗлӗшпе пуҫиле ӗҫ пуҫарнине пӗлтернӗччӗ.

Сергей Беккер тунӑ сӑн

Тӑван ҫӗршывӑн Аслӑ вӑрҫин ветеранӗ пурӑнакан ҫуртра 30 ҫул юсав ӗҫӗсем ирттермен. Вӑл пиллӗкмӗш хутри хваттерте кун кунлать. Ҫурт тӑрринчен шыв анать, вӑл пӗрремӗш хутах ҫитет, ҫавӑнпа ватӑ кӑна мар, кӳршисем те шар кураҫҫӗ.

Юсав ӗҫне тахҫантанпах курман ҫурт Ҫӗрпӳ хулинчи Куйбышев урамӗнче (1-мӗш ҫурт) вырнаҫнӑ. Унта юлашки хутчен юсав ӗҫне 1990 ҫулта ирттернӗ. Халӗ ав йӗпе-сапара тӑрринчен шыв анать, подъездра ҫумӑр ҫунӑ евӗрех. Хваттерсенче те кунашкал ӳкерчӗк. Ҫапла пурӑнать 90 ҫулти ветеран.

Пурӑнакансем прокуратурӑран та, ҫурт-йӗр инспекцийӗнчен те пулӑшу ыйтнӑ, анчах усси питех ҫук. Ҫурт-йӗр инспекцийӗ управляющи компанийӗ тӗлӗшпе представлени ҫырнӑ, анчах лешӗ ҫурт тӑрринчен юр тасатнипех ҫырлахать.

Ҫынсем каланӑ тӑрӑх, ҫурт тӑррин майӗ ҫук, пур ҫӗрте те ура путать. Ҫак ҫуртра пурӑнакансемшӗн Сергей Беккер депутат пӑшӑрханать. Управляющи компанийӗн ертӳҫипе калаҫнӑ хыҫҫӑн ҫынсемпе пуху ирттерме йышӑннӑ. Унта тӑрӑна юсас ыйтӑва пӑхса тухӗҫ.

Анжелика Сидорова

ЧР Министрсен Кабинечӗ тӗнче шайӗнче палӑрнӑ спортсменсене преми пама йышӑнӑ. Кун пирки ведомствӑн пресс-служби хыпарлать.

Игнатьев ячӗллӗ спорт хатӗрленӗвӗн центрӗн воспитанникӗ Анжелика Сидорова ҫӑмӑл атлетика енӗпе иртнӗ Европа чемпионатӗнче лайӑх кӑтартупа палӑрнӑшӑн 75 пин тенкӗ премие тивӗҫнӗ. Ҫак уйӑх пуҫламӑшӗнче спортсменка Аслӑ Британири ӑмӑртура шӑчӑпа сиксе ҫӗнтернӗ. Кунсӑр пуҫне ӑна уйӑхсерен пӗр ҫул 6,5 пин тенкӗ парса тӑрӗҫ.

А.И.Тихонов ячӗллӗ спорт хатӗрленӗвӗн центрӗн воспитанникӗ Александр Васильев та хавхаланӑва тивӗҫнӗ, ӑна 25 пин тенкӗ пама йышӑннӑ. Вӑл Италире хӗллехи триатлон енӗпе иртнӗ тупӑшура кӗмӗл медаль илнӗ. Унӑн тренерне те укҫан хавхалантарӗҫ: 12,5 пин тенкӗ парӗҫ.

Тутарстанри Пӑва районӗнчи Чӑваш Киштекӗ ялӗнче пурӑнакан ачасем чӑваш, тутар, вырӑс, удмурт ташшисене ташлаҫҫӗ. Вӗсене ҫак ӑсталӑха асӑннӑ ялти культура ҫуртӗнче хӑнӑхтараҫҫӗ.

Учреждени ертӳҫи Тамара Петрова Тат.медиа кӑларӑма пӗлтернӗ тӑрӑх, ялта ачасен юрӑ-ташӑ кружокӗсем ӗҫлеҫҫӗ. Ачасем халӑх музыка инструменчӗсемпе калаҫҫӗ, театр кружокне ҫӳреҫҫӗ.

«Эпир чӑваш ташшисене вӗренетпӗр кӑна мар, ытти халӑх культурине те аталантаратпӑр. Нумаях пулмасть выляса илнӗ 100 пин тенкӗ укҫапа наци тумтирӗсене ҫӗлеттертӗмӗр», — тесе каласа кӑтартнӑ культура ҫурчӗн ертӳҫи.

Ҫӗнӗ тумтирпе Чӑваш Киштекӗнчи ачасем сцена ҫине тухнӑ та ӗнтӗ.

Тат.медиа Пӑва районӗнче тӗрлӗ халӑх ҫыннисем пурӑннине пӗлтернӗ. Унта нумаях пулмасть куҫса пынисем те пур иккен. Вӗсем пурте туслӑ пурӑннине пӗлтернӗ.

Етӗрне хули ҫумӗпе юхса иртекен Сӑр юханшывӗ урлӑ эстакада тӑвассине Чӑваш халӑх сайчӗ пӗлтернӗччӗ. Аса илтерер, «Волго-Вятскуправтодор» федерацин хысна учрежденийӗ ҫав ӗҫе хӑш организаци пурнӑҫлассине пӗлтӗрхи утӑ уйӑхӗн 17-мӗшӗнче палӑртнӑччӗ.

Атӑл-Вятскуправтодорӑн пресс-службинче пӗлтернӗ тӑрӑх, ӗҫсене графикпа килӗшӳллӗн пурнӑҫласа пыраҫҫӗ. Халӗ унта эстакадӑн пӑрӑсӗсене хума пуҫланӑ. Пӗтӗмпе 23 тӑрӑх хурса тухмалла, вӗсем 33 метр тӑршшӗ тимӗр конструкцирен тӑрӗҫ.

700 метр ытла вӑрӑмӗш эстакада 100 тонна ытла машина йывӑрӑшне пӗр харӑс чӑтма пултарассине шантараҫҫӗ.

Атӑл-Вятскуправтодорӑн пресс-служби хыпарланине ӗненсен, мӗнпур ӗҫе 2020 ҫулхи утӑ уйӑхӗччен туса пӗтермелле.

ЧР спорт министерствин финанспа экономика пайӗн пуҫлӑхӗ, тӗп бухгалтер телефонпа 18 пин тенкӗлӗх калаҫнӑшӑн сайтра хыпарланӑччӗ. Пуш уйӑхӗн 26-мӗшӗнче ведомство ӗҫченӗсем ҫак хӗрарӑма асӑннӑ пайра упранакан документсене (вӑл айӑплине ӗнентерекеннисене) йӑтса тухма хӑтланнине курнӑ та ӑна ҫакна тума паман.

Аса илтерер: унччен пӗр кун маларах, пуш уйӑхӗн 25-мӗшӗнче, пай пуҫлӑхӗ тӗлӗшпе пуҫиле ӗҫ пуҫарнӑ. Вӑл хӑй пӗлнӗ пек хысна укҫине телефон счечӗ ҫине хунӑ. Укҫа-тенке ведомствӑн экс-ӗҫченӗн телефон счечӗ ҫине те куҫарнӑ пулнӑ.

Министерство тӗп бухгалтер документсене тӗп тума хӑтланнине йӗрке хуралне пӗтернӗ. Саккунпа килӗшӳллӗн, ҫак ҫынна шанчӑка ҫухатнӑшӑн ӗҫрен кӑлармалла, анчах хальлӗхе вӑл хӑй вырӑнӗнчех-ха.

Патшалӑхӑн пӗрлӗхлӗ экзаменӗсем пуҫланиччен вӑхӑт нумаях юлмарӗ – ҫу уйӑхӗн 27-мӗшӗнче тытӑнӗҫ. Кӑҫал республикӑра 6219 ҫын экзамен тытӗ, пӗлтӗр 6068-ӑн пулнӑ.

Чылайӑшӗ кӑҫал обществознани предметне суйланӑ: 3,4 пин ҫын. Физикӑна – 2 пин ытла, ют чӗлхе предметне – 709, вырӑс литературине – 441, географие 340 ҫын тытӗ. Палӑртмалла: кӑҫал ют чӗлхесен йышӗнчен китай чӗлхине те суйласа илме ирӗк пур. Ӑна Раҫҫейри 43 регионти 289 ҫын суйланӑ. Чӑваш Енре вара ку предметпа пӗр ҫын пӗлӗвне тӗрӗслӗ. Предмет комиссийӗн председателӗ И.Я.Яковлев ячӗллӗ ЧППУ аспирантки, Китай ҫынни пулӗ.

Каласа хӑвармалла: ҫу уйӑхӗнче географипе тата литературӑпа экзаменсем пулӗҫ.

Ҫитес тунтикунран, ака уйӑхӗн 1-мӗшӗнчен, Шупашкартан районсене ҫӳрекен 7 маршрут автобусӗсем ҫӗнӗ автостанцирен тапранса кайӗҫ. Кун пирки «ПроГород Чебоксары» кӑларӑм хыпарлать.

Хайхи ҫӑлкуҫ пӗлтернӗ тӑрӑх, ҫӗнӗ автостанци Бабушкин урамӗнчи 8-мӗш А ҫурт адреспа вырнаҫнӑ. Ӑнланмалла каласан, вӑл «Ярмӑрккӑ» суту-илӳ комплексӗ ҫумӗнче пулӗ. Унтах билет сутакан касса ӗҫлӗ. Ку ҫӗнӗлӗх 137, 148, 217, 230, 252, 321, 330 маршрутсемпе ҫӳрекен автобуссене пырса тивӗ.

Палӑртса хӑвармалла, автобуссен расписанийӗ улшӑнмӗ. Хайхи автобуссем Хулаҫум автовокзалӗ ҫумӗнчен иртӗҫ, пассажирсене унтан та лартса кайма пултарӗҫ:

№ 137. Шупашкар — Ҫӗрпӳ — Кӑнар.

№ 148. Шупашкар — Апакасси.

№ 217. Шупашкар — Вӑрӑмҫут.

№ 230. Шупашкар — Аксарин — Ҫатракасси.

№ 252. Шупашкар — Малтикасси.

№ 321. Шупашкар — Янӑш.

№ 330. Шупашкар — Ҫӗньял Покровски.