Кӑрлач уйӑхӗн 10-28-мӗшӗсенче Мускаври ВДНХра иртекен «Раҫҫей» курав-форумра ЧР Культура министерстви экспозиципе паллаштарать.
Ҫак тапхӑрта хӑнасем чӑвашсен йӑли-йӗркипе, культурин уйрӑмлӑхӗсемпе паллашма пултараҫҫӗ. Хӗр илни, салтака ӑсатни, ҫӗн пӳрт ӗҫки - ҫак йӑласене туса кӑтартӗҫ экспозицире.
Ҫавӑн пекех ӑсталӑх класӗсем иртӗҫ: хореографи енӗпе, чӑвашсен пуҫа тӑхӑнмалли хатӗрӗсене, костюмӗсене тата пуканесене ӑсталассипе.
Аса илтерер: курав-форум ака уйӑхӗн 4-мӗшӗччен ӗҫлӗ.
Геннадий Айхин «Стихотворения» кӗнеки Мускаври «Эксмо» издательствӑра 10 пин тиражпа пичетленсе тухнӑ. Кӗнекене сӑвӑсем ҫеҫ мар, эссесем те кӗнӗ. Унсӑр пуҫне Атӑлҫи тӑрӑхӗнчи халӑх юррисем евӗрлӗ «Поклон – пению» тата «Мир Сильвии» сӑвӑсем кӗнӗ.
Кӗнекене пухса хатӗрленӗ Арсен Мирзаев кӑларӑма малтанласа «День присутствия всех и всего» ят пама шухӑшланине, анчах кӗнеке кӑларакансем ят ытла та вӑрӑм тесе каланине пӗлтернӗ.
Шупашкарти музейсем Ҫӗнӗ ҫул тӗлӗнчи вӑрӑм канмалли кунсенче те ӗҫлӗҫ. Кӑрлач уйӑхӗн 2-7-мӗшӗсенче Чӑваш наци музейӗ, Чӑваш тӗррин музейӗ, В.И. Чапаев ячӗллӗ музей тата Куславкка тӑрӑхӗнчи «Чӗмсӗр чикӗсен строителӗсене» мемориал ӗҫлӗҫ.
Музейпа курав центрӗ куракансене кӑрлач уйӑхӗн 2-6-мӗшӗсенче йышӑнӗ, К.В. Иванов ячӗллӗ Литература музейӗ — кӑрлач уйӑхӗн 4, 5 тата 6-мӗшӗсенче, Ҫеҫпӗл Мишши музейӗ — кӑрлачӑн 5-мӗшӗнче.
Кӑрлач уйӑхӗн 8, 9-мӗшӗсенче музейсенче канмалли кунсем пулӗҫ, 10-мӗшӗнчен Чӑваш наци музейӗпе унӑн филиалӗсем ытти чухнехи режимпа ӗҫлеме тытӑнӗҫ.
Чӑваш кӗнеке издательстви 2023 ҫулта 81 тӗрлӗ кӗнеке кун ҫути кӑтартнӑ. Вӗсен пӗтӗмӗшле тиражӗ — 155 пин экземпляр. Асӑннӑ 81 кӗнекерен 35-шӗ — чӑвашла, 31 – чӑвашла тата вырӑсла, 15-шӗ – вырӑсла.
Хӑш-пӗр кӑларӑм кӗнеке кӗнеке конкурсӗсенче дипломсене тивӗҫнӗ. Сӑмахран, чӑваш халӑх юмахӗсен «Ула курак тӗнче курма кайни. Как ворона хотела мир повидать» юмахсен пуххи, Владимир Трофимовпа Алексей Кировӑн «Чебоксары: виды города за последние 150 лет» кӗнеке-альбомӗ. «Ҫул кайӑкӗ» кӗнеке, Юрий Васильевӑн «Энциклопедия музыкально-театрального искусства Чувашии» кӗнеки, «Иван Яковлевич Яковлев – великий просветитель» кӗнеке-альбом (автор-составителӗсем – Федор Козлов тата Евгений Касимов).
Юрий Васильевӑн «Энциклопедия музыкально-театрального искусства Чувашии» тата Владимир Трофимовпа Алексей Кировӑн «Чебоксары: виды города за последние 150 лет» кӗнеки-альбомӗ Раҫҫейӗн регионӗсенчи чи лайӑх 50 кӗнеке шуне кӗнӗ.
Чӑваш кӗнеке издательстви «Чӑваш романӗ» литература конкурсне ирттерессине эпир унччен пӗлтернӗччӗ-ха.
Аса илтерер: ӗҫсене ярса пама кая юлман-ха. Вӗсене 2024 ҫулхи юпа уйӑхӗн 1-мӗшӗччен fed_ol@mail.ru электрон адреспа йышӑнаҫҫӗ. Е Шупашкарти Чӑваш кӗнеке издательствине илсе ҫитерсе памалла.
Конкурса тӑратнӑ ӗҫсем чӑвашла пулмалла. Конкурса халиччен пичетленмен хайлавсемпе хутшӑнмалла. Вӗсен тематики ирӗклӗ. Калӑпӑшӗ А4 форматпа 700 страницӑран ытла мар пулмлала мар.
Кӑрлач уйӑхӗн 13-мӗшӗнче Чӑваш Енӗн Наци вулавӑшӗ тата Чӑваш Енри Профессиона писательсен союзӗ ҫул ёлки ирттерме палӑртнӑ. Ӑна Халӑхсен туслӑхӗн ҫуртӗнче йӗркелӗҫ.
Литература ёлкине поэтсем тата поэзие юратакансем пуҫтарӑнӗҫ. Вӗсем иртсе кайнӑ ҫулталӑка пӗтӗмлетӗҫ, сӑвӑсем вулӗҫ.
Ҫӗнӗ ҫул тата Сурхури умӗн Шупашкарта тӳлевсӗр экскурсисем ирттерӗҫ. Ун вӑхӑтӗнче хулан тӗп тата историлле пайӗсемпе паллашарӗҫ.
Тӳлевсӗр экскурсисем раштавӑн 30-мӗшӗнче 9 тата 13 сехетре, кӑрлачӑн 2 тата 3-мӗшӗсенче 10 сехет те 30 минутра тата 13 сехет те 30 минутра, кӑрлачӑн 4 тата 4-мӗшӗсенче 10 сехет те 30 минутра тата 13 сехетре пуҫланӗҫ.
Экскурси маршучӗ ҫапларах: Арбат (Ефремов купса бульварӗ), Хӗрлӗ лапам, ҫуран ҫӳрекенсене каҫса ҫӳремелли кӗпер, Константин Иванов скверӗ, Мускав ҫыранӗ.
Ушкӑнра 20 ҫынтан ытла пулмӗ. Ҫав йыша лекес тесен 8 (8352) 23-20-34, 23-20-36 телефон номерӗсемпе раштав уйӑхӗн 29-мӗшӗччен ӗҫ кунӗсенче ирхи 8 сехетрен пуҫласа 17 сехетчен шӑнкӑравламалла.
Халӑх инструменчӗсен «Эревет» ансамбльне сумлӑ ята твиӗҫнӗ.
Коллектив Шупашкарти Ача-пӑчапа ҫамрӑксен пултарулӑх центрӗнче ӗҫлет. Нумаях пулмасть ӑна Раҫҫей Федерацийӗн «Халӑх пултарулӑхӗн тава тивӗҫлӗ коллективӗ» ята панӑ. Приказа Раҫҫейӗн Культура министерстви раштав уйӑхӗн 21-мӗшӗнче алӑ пуснӑ.
Чӑваш Республикин тата Раҫҫейӗн кульурӑн тава тивӗҫлӗ ӗҫченӗ Сергей Федотов «Эревет» ансамбле 1981 ҫулта йӗркелесе янӑ. Тепӗр вунӑ ҫултан коллектва тӗслӗхлӗ ача-пӑча коллективӗ ят панӑ. Пултарулӑх ушкӑнӗ — Ҫеҫпӗл Мишши ячӗллӗ ҫамрӑксен премийӗн лауреачӗ.
Чӑваш Енре халӗ Вырӑс провинцийӗн музейӗ те пур. Вӑл Улатӑрта хула училищин революци умӗнхи ҫуртӗнче вырнаҫнӑ.
Икӗ хутлӑ ҫурта 1911 ҫулта хута янӑ. Вӑл истори тата культура историйӗсен списокне кӗрет. Унта вырӑс провинцийӗн музейӗ пуласси пирки 2021 ҫултах пӗлтернӗ. Ҫурта юсаса ҫӗнетнӗ, халӗ ав вӑл хӑйӗн алӑкне уҫнӑ.
Экспозицире - Улатӑр хулин тата Улатӑр уесӗн историйӗ: 1952 ҫултан пуҫласа 20-мӗш ӗмӗрӗн 30-мӗш ҫулӗсемччен.
Муркаш муниципаллӑ округӗнчи Кашмашри культура ҫурчӗ 75 ҫул тултарнӑ, унти «Ӑраскал» юрӑпа ташӑ ансамблӗ — 25 ҫул. Кун пирки халӑх тетелӗсенчен пӗринче Любовь Рыжкова пӗлтернӗ.
«Кашмаш ялӗнче паян пысӑк уяв — юбилей каҫӗ, пулса иртрӗ. Роза Николаева ҫирӗппӗн ертсе пынипе ҫулсеренех кунта халӑх театрӗ те, халӑх юрӑпа ташӑ ансамблӗ те аталансах, ешерсех пыраҫҫӗ. Кашмашри культура ҫурчӗн малашлӑхӗ пысӑк та ҫутӑ пуласса шанатӑп эпӗ. Ҫапла пултӑр!» — тесе ҫырнӑ маларах асӑннӑ ҫӑлкуҫра.
Сӑмах май каласан, ялти юрӑпа ташӑ ансамблӗ Чӑваш Республикин Культура министерствин приказӗпе килӗшӳллӗн «халӑх» ятне тивӗҫнӗ.
+22.3 °C