Унччен союзлӑ республика пулнӑ ҫӗршывра пурӑнакан вырӑс тымарӗллӗ ҫамрӑк арҫын Шупашкарта тӗпленме ӗмӗтленет.

26 ҫулти арҫын Раҫҫейӗн Шалти ӗҫсен министерствин хӑйӗн ҫӗршывӗнчи элчелӗхне репатриант патшалӑх программине хутшӑнас ӗмӗтлине пӗлтерсе заявлени панӑ. Ун пек программӑна пирӗн ҫӗршыв Президенчӗ 2023 ҫулта йышӑннӑ.

Ҫамрӑк арҫыннӑн амӑшӗн аслашшӗ Сарту облаҫӗнчен пулнӑ иккен. Ҫемьере тӑване вилни ҫинчен калакан хут ҫеҫ юлнӑ. Хыпара тӗрӗслеме Сарту облаҫӗн патшалах архивне ыйтса ҫырнӑ. Ҫав ҫын Самар кӗпӗрнийӗнчи (халӗ Сарту облаҫӗнчи) Натальино ялӗнчен пулнине палӑртнӑ.

Кӑҫал 26-ри арҫынна маларах асӑнна программӑна кӗртнӗ, вӑл Чӑваш Енре ӗҫлесе пурӑнма ӗмӗтленет.

Ӗнер, утӑ уйӑхӗн 6-мӗшӗнче, патшалӑхӑн автоинспекцийӗн ҫул-йӗр службин экипажӗ ҫул хӗррипе Муркаш районӗнче ҫул хӗррипе утса пыракан ватӑ арҫынна асӑрханӑ. «Автанкасси – Муркаш - Чикме» ҫулпа патруле тухнӑ экипаж ватаран пӑрӑнса иртмен, чаранса вӑл ӑста кайма тухнипе кӑсӑкланнӑ.

Арҫын Муркаш районӗнчи Йӳҫкассинчи ваттисемпе сусӑрсен интернат-ҫуртӗнчен темисе сехет маларах тухса кайнӑ, вӑл 10 километр ытла кайма ӗлкӗрнӗ иккен.

«Ватӑ ҫын машинӑсем вӑйлӑ, йышлӑ ҫӳрекен ҫул хӗррипе утса пынине шута илсен инкке лекес хӑрушлӑх та пулнӑ. Ҫавӑнпа эпир ӑна тӗл пулни пите вырӑнлӑ пулчӗ», - класа кӑтартнӑ Алексей илларионов аслӑ инспектор.

Ватӑ ҫынна интерната кайса леҫнӗ.

Шупашкарта пурӑнакан ӳрӗк ватӑсен кичемленсе ларма вӑхӑт ҫук. Хулари халӑхӑн социаллӑ ыйтӑвӗсене тивӗстерекен комплекслӑ центра кӑна мӗнле кӑна заняти иртмест-ши! Пурте юрлама-ташлама ӑста мар, зарядка тесен те пурте хыпса ҫунмаҫҫӗ. Ун пеккисем ал ӗҫӗпе чуна уҫма пултараҫҫӗ. Ҫитменнине тата ун пек ӗҫе ларса пурнӑҫламалла.

«Ал ӑсти» клуба ҫӳрекенсем кивӗ япаласене тӗрӗс усӑ курма вӗренеҫҫӗ. Центрта ӗҫлекен Валентина Ильина специалист пулӑшса та вӗрентсе пынипе вӗсен кирлӗ мар япаларан хитре япаласем ӑсталаҫҫӗ.

«Ватӑсем «Ал ӑсти» клуба хавхалансах ҫӳреҫҫӗ», - тесе пӗлтерет учрежденире пай заведующийӗнче ӗҫлекен Любвоь Сымолкина.

Синоптиксем пӗлтернӗ тӑрах, ку эрнере тинех шӑрӑх пулӗ. Термометр 30 градус кӑтартӗ, хӑш-пӗр вырӑнта — 35 градус таранах.

Паян каҫхине аслатиллӗ ҫумӑр ҫума пултарать. Ыран вара 24-29 градус таран ӑшӑтӗ. Чи шӑрӑх кунсем кӗҫнерникунпа эрнекун пулӗҫ. Ун чухне ҫӗрле те 20 градус ӑшӑ пулӗ.

Канмалли кунсенче каллех кӑшт сивӗтӗ. Утӑ уйӑхӗн 15-19-мӗшӗсенче сивӗ ҫанталӑк тӑрӗ, хальхинче – уяр, ҫумӑрсӑр. Ҫумӑр утӑ уйӑхӗн 11 тата 15-мӗшӗсенче ҫӑвӗ.

Малтанлӑха пӗлтернӗ тӑрӑх, шӑрӑх кунсем виҫҫӗмӗш декадӑра татах таврӑнӗҫ.

cap.ru сайтри сӑн

Улатӑр округӗн хисеплӗ гражданинӗ Мария Чеписова ҫак кунсенче 100 ҫул тултарнӑ.

Тӑван ҫӗршывӑн Аслӑ вӑрҫи пуҫланнӑ чухне вӑл 16-ра пулнӑ, алла катмакпа кӗреҫе тытса Сӑр ҫывӑхӗнче аслисемпе тан окоп чавнӑ.

«Нимӗҫсем килесрен хӑрушӑччӗ, ҫавӑнпа сывлӑш ҫавӑрса илмесӗр ӗҫленӗ. Унта пӗтӗм класӗпе ӗҫленӗ эпир, шӑнса та хытнӑ, апат та ҫиес килнӗ, анчах аттесем фронтра пулнине, вӗсене пулӑшмаллине ӑнланнӑ», - ҫапла аса илет ҫав вӑхӑта пӗр ӗмӗре парӑнтарнӑ кинемей.

Вӑрҫӑ хыҫҫӑн Мария Чеписова райздравра акушерство енӗпе инструкторта ӗҫленӗ. Кайран санэпидемстанцире 38 ҫул вӑй хунӑ.

www.cap.ru сӑнӳкерчӗкӗ

Ӗнер, утӑ уйӑхӗн 6-мӗшӗнче, Мускаври ВДНХра чӑваш Акатуйӗ иртнӗ.

Уява халӑх ансамблӗсем, эстрада юрӑҫисем, профессилле артистсем хутшӑннӑ. Вӗсен йышӗнче Чӑваш патшалӑх юрӑпа ташӑ ансамблӗ, «Ярды» вокал ушкӑнӗ тата Августина Уляндина, «Бельканто» классик-ушкӑн, «Ҫеҫпӗл» чӑваш вокал ансамблӗ, «Ҫавал» фольклорпа эстрада ансамблӗ.

Уява пынисем валли крафт вӑййисем йӗркеленӗ, Чӑвашра туса илекен сувенир тата ытти продукцин курав-ярмаркки ӗҫленӗ.

Ӑл ӑстисем хушпу, пукане, сыхлӑх хатӗрӗсем, шӑрҫаран тата хӑваран авса япаласем тума вӗрентнӗ.

Раҫҫей кухнин ҫуртӗнче хуплу, шӳрпе, пашалу пӗҫерме вӑрентекен ӑсталӑх лаҫҫисем ӗҫленӗ.

www.cap.ru сӑнӳкерчӗкӗ

Утӑ уйӑхӗн 9-мӗшӗнче Шупашкарта Вячеслав Миловӑн «По лабиринту моего пути» кураве уҫӑлӗ. Мероприяти Чӑваш Енӗн Наци вулавӑшӗнчи «Кӗмӗл ӗмӗр» галерейӑра 16 сехетре пуҫланӗ. Курава художник ҫуралнӑранпа 70 ҫул ҫитнине халаллӗҫ.

Экспозици 80 ытла живопись ӗҫӗнчен тӑрӗ. Вӗсене автор реализм тата абстракт стильсемпе ӳкернӗ. Картинӑсем урлӑ художник чунне уҫса парать, тӗнче нумай енлине кӑтартса парать.

Вячеслав Милов 1955 ҫулти ута уйӑхӗн 18-мӗшӗнче Чулхула облаҫӗнчи арзамас хулинче ҫуралнӑ. Чӑваш пединститутӗнчи художествапа графика факультетӗнчен вересне тухнӑ хыҫҫӑн Шупашкарта художник-оформитель, изобразительнӑй ӳнер учителӗ пулса ӗҫленӗ.

Тутарстанри Сиктӗрме ялӗнче иртнӗ «Уява» 20 пин ытла ҫын хутшӑннӑ.

Аса илтерер: ҫак мероприяти Иван Казанков тӑрӑшнипе тата пулӑшнипе иртет. Вӑл «Звениговский» аш-какай комбиначӗн директорӗ.

Петӗр Хусанкай ҫуралса ӳснӗ яла Раҫҫейри тӗрлӗ регионтан делегацисем, пултарулӑх коллективӗсем килнӗ. Уявра фестиваль-конкурс, спорт ӑмӑртӑвӗсем, ӑсталӑх класӗсем иртнӗ. Кӑҫал «Раҫҫей чӑваш пики» конкурс та йӗркеленӗ. Ҫӗнтерӳҫӗ ятне Елчӗк округӗнчи Виктория Романова тивӗҫнӗ.

Олег Чудаков архивӗнчи сӑн

Вӑл 20 кунра велосипедпа 1800 ҫухрӑм кайса тинӗс патне ҫитнӗ. Сӑмах — Хӗрлӗ Чутай округӗнче ҫуралса ӳснӗ Олег Чудаков пирки.

Вӑл ҫӗртме уйахӗн 15-мӗшӗнче велосипедпа ҫула тухнӑ та нумаях пулмасть Джугбӑна ҫитнӗ. «Ку финиш мар-ха. Кӑштах канӑп та малалла кайӑп», — тесе ҫырнӑ Олег хӑйӗн страницинче.

Вӑл хӑйӗн ҫулҫӳревӗ пирки «Контактри» страницинче пӗлтерсе тӑнӑ. Хӑй пӗлтернӗ тӑрӑх, каялла вӑл пуйӑспа килесшӗн.

37.мвд.рф сайтри сӑн

Чӑваш Енре «Автоледи» республика конкурсӗ иртӗ. Ӑна «Ҫул-йӗр ҫинчи хӑрушсӑрлӑх» проектпа килӗшӳллӗн йӗркелеҫҫӗ.

Конкурса 18 ҫул тултарнӑ, водитель правине илнӗ хӗрсемпе хӗрарӑмсем хутшӑнма пултараҫҫӗ. Вӑл икӗ пайпа иртӗ: теори тата практика. Ҫавӑн пекех пултарулӑх заданийӗсем пулӗҫ.

Заявкӑсене ҫак электрон адреспа йышӑнаҫҫӗ:

familycheb@mail.ru.